攝影：鄭樂天，圖片M+提供
旁述：
呢件作品嘅名稱係《西元2000年》，係岳敏君喺2000年創作嘅裝置作品，當中包括二十五個人形雕塑，物料分別有塑膠彩、聚酯纖維同玻璃纖維。每個雕塑大約有一米八咁高，成組作品嘅尺寸視乎展示空間而定。喺2025年開幕嘅「M+希克藏品：心靈圖景」展覽裏面，作品擺喺一個靠窗嘅空間展示 。雕塑全部都背對住窗，好似兵馬俑咁一行一行整齊排列。
呢啲企喺度嘅人形雕塑，全部都係黃皮膚、中等身形嘅男人，佢哋嘅面容、姿勢同服飾都一模一樣。每一位男士都係國字口面，合埋眼，擘大血紅色嘅嘴，露齒大笑；佢哋個嘴擘到好大，大到幾乎佔據成塊面嘅三分之一。呢啲男人全部都留有一頭貼服嘅黑色短髮，露出寬闊嘅額頭。佢哋個個雙手擺喺背後，雙腳分開到同膊頭一樣闊，赤腳企喺方形金屬板上。每個人都着住一件泛黃嘅白色圓領短袖T恤，衫腳攝入黑色西褲，件衫同褲管上都有皺摺。
呢啲男人笑得好誇張，但係大笑背後嘅原因無人知道。佢哋嘅站姿整齊劃一，好似軍人列隊咁樣，再加上皮笑肉不笑嘅詭異表情，令到作品嘅整體氣氛充滿壓迫感同不安感。