顧德新 《2021年11月12日》

旁述：

嚟睇下呢一張充滿儀式感嘅紅色凳，藝術家顧德新喺第一次展出呢個作品嘅時候，曾經用豬內臟脂肪填滿凳嘅裏面，俾佢隨住時間腐化。

侯瀚如：

呢個可以話係一種非常直接了當、對權力同金錢崇拜嘅展示。然後仲涉及人嘅呢種對於高貴地位嘅追求，所以就喺地上面鋪咗一張紅地氈。

旁述：

藝評人兼策展人侯瀚如，係同顧德新合作多年嘅好友，佢同我哋分享顧德新用肉嚟做作品，象徵對生命狀態嘅一種把握。肉又係我哋人類嘅消費品，同時佢又係一個會腐敗嘅載體，呢種載體指嘅係我哋由出世、成長到死亡，都有住人類唔可以避免嘅命運載體。

侯瀚如：

我哋都希望將呢種生命裝飾同講到非常美好，但係呢種永恆實際上係一種幻想、一種幻覺。佢將呢一種幻覺揭露出嚟畀我哋，篤穿咗呢一種虛假嘅真實，而將真正嘅真實放到我哋面前。佢自己都係生活喺當中，生活喺咁樣嘅一個從希望到腐敗嘅過程。

旁述：

呢件作品原本嘅名稱係《2000年11月4日》，係顧德新喺2000年創作嘅裝置作品。為咗記念M+嘅開幕日，作品而家重新名命為《2021年11月12日》。

呢件作品嘅創作物料包括紅地氈、軟墊凳、豬嘅內臟脂肪同鍍金畫框。喺2023年開幕嘅「M+希克藏品：別傳」展覽中，由開幕日起一連三日，就展出成組作品，包括張用豬嘅內臟脂肪填塞嘅軟墊凳。觀眾可以喺呢段時間坐喺張凳度感受軟墊嘅質感。之後，因為考慮到作品修復同保管嘅關係，凳面嘅坐墊就會改用聚脂纖維做嘅填塞物料，觀眾唔再可以觸摸作品。

呢件裝置作品喺一個長方形嘅展區展出。張紅色軟墊凳闊約50厘米，放係展區中央位置附近。如果坐喺凳度面向展區最遠嘅嗰幅牆，會見到牆上有一個金色畫框，成個框比一道門高，闊約兩米半。框中間係全紅色嘅畫面​​。仔細睇，個畫面係直接用紅色塑膠彩油落牆身度。呢個紅色畫面入面，有黑色細字寫住作品名稱​​。一張紅色地氈就由軟墊凳沿地面延伸去到對面嘅牆邊，即金色框嘅正下方，地氈有9米長，闊度同金色框差唔多​。而軟墊凳、畫框中間嘅畫面同地氈嘅紅色，都係近似嘅鮮紅色。