段建宇 《藝術雞 第12號》

旁述：

喺呢幅畫，段建宇將一隻燒雞畫咗喺桂林山水入面，睇起上嚟非常荒誕。佢由2003年開始就經常用雞做繪畫題材，佢同我哋分享咗背後嘅原因。

段建宇：

我覺得喺2000年之後，現實生活嘅變化非常劇烈，無論係經濟上，定係呢種生活嘅情境上。

呢個「藝術雞」呢，我覺得佢有幾個層面，第一，雞係我哋廣東人經常食嘅一種食物，佢有一種生活嘅庸俗感同瑣碎感。第二就係，例如我哋會經常將某一類工作者叫做「雞」。喺當時嘅藝術界有一種現象，就係大家因為中國當代藝術啱啱發展，開始蓬勃發展咗十幾年之後，大家對呢種展覽機會同名利，其實都睇得好重。

我覺得雞呢個形象呢，就係佢成日都係唔係好守規矩，跑嚟跑去。咁都可能反映咗我有一種諗法，就係成日會四周圍搗亂，就係唔啱規矩，然後去破壞大家營造嘅高雅。

桂林山水呢種比較庸俗嘅符號，同雞放埋一齊，我覺得佢哋又組成咗一個新嘅景觀，對我嚟講，呢件係比較有想像力嘅事。好似呢幅作品咁，我就係想畫呢一種好似夢境咁，比較突兀嘅一種形象。

旁述：

呢件作品嘅名稱係《藝術雞 第12號》，係段建宇喺2004年創作嘅油彩布本，高約182厘米，長約217厘米。作品描繪一隻大肥雞倒吊喺一棵椰子樹到，背景係連綿不絕嘅崇山峻嶺，天色陰暗。

椰子樹喺畫面左邊，佔畫面高度約四分之三，幼身嘅灰色樹幹微微向右彎。樹頂以唔同深淺嘅綠色線條簡約勾勒出九塊樹葉，以及十個圓形果實。樹葉向下展開，葉邊呈鋸齒狀，有部分位置嘅顏色較淺，睇落好似因為描繪時使用嘅顏料較少而留下嘅痕跡。

樹幹右邊其中一塊葉嘅末端，綁住一隻大肥雞嘅腳，倒吊住隻雞。呢隻黃色肥雞有成棵樹咁大，差唔多掂地。佢無頭無爪亦無毛，身軀飽滿，黃色嘅雞皮上有一點一點嘅毛孔，睇起嚟好似原隻燒雞。

背景嘅天空呈淡淡嘅粉藍色，混有一抹抹淡黃色。天空下方有一重又一重嘅山，山巒起伏，山勢陡峭，顏色有黑色同淡灰色，似係愈近前景嘅山就愈暗，愈遠嘅山就愈明亮。群山之下，右方有濃重嘅黑色，而左下方有一道道灰白色，睇起嚟，右邊似土地，左邊似係湖。