劉窗 《比特幣礦和少數民族田野錄音》

旁述：

呢件作品嘅名稱係《比特幣礦和少數民族田野錄音》，係劉窗喺2018年創作嘅錄像裝置作品，係彩色、有聲嘅三頻道數碼錄像，片中包含多種語言，片長40分鐘。

作品由左、中、右三個螢幕組成，各自播放唔同嘅影片。雖然三個螢幕嘅畫面以唔同嘅速度切換，但係畫面嘅內容大致上相同，都係圍繞人、自然、歷史、科技、金融等等嘅主題，以唔同嘅角度同鏡頭呈現一樣嘅事物，有時又會以圖片、動畫或者錄像嘅形式表達，配合木雅語嘅旁白，夾雜住客家話同英文，加上唔同嘅聲音同音樂，從而將三個螢幕嘅畫面串連起嚟。藝術家透過呢件作品探索2010年代喺中國水力發電廠附近進行嘅加密貨幣挖礦活動，並探討呢啲活動點樣影響包括中國西南部以至東南亞嘅贊米亞地區。

錄像一開始，首先出現各種各樣嘅中式建築圖片，然後鏡頭拉近，聚焦喺呢啲古建築旁邊嘅電線同電線杆。畫面一轉，出現咗上世紀電報員以人手打電報嘅黑白圖片。伴隨住配樂嘅節奏，左邊嘅螢幕出現咗一隻手，好似彈奏古琴咁，隔空彈撥一條條吊喺空中嘅電線；而右邊嘅螢幕亦出現一隻手，喺電腦觸控板上面滑動。

然後，畫面切換到山區嘅水庫、電塔、電纜，同埋隱藏喺發電廠裏面嘅比特幣礦場。畫面以動畫形式顯示一部部圓形嘅散熱風扇，喺水庫裏面不斷運轉。然後，左邊螢幕嘅鏡頭轉換成一個特寫，影住一滴圓形水珠，右邊嘅螢幕接續顯示一支筆穿過水珠，寫上好似英文字母「B」字嘅比特幣符號。畫面再切換到行駛緊嘅高鐵車廂，聚焦一塊放喺窗邊、面值一蚊人民幣嘅圓形硬幣，右邊嘅螢幕以特寫鏡頭影住硬幣邊緣嘅英文字母「B」字。然後，三個畫面不斷顯示一張張少數民族嘅人像照片。

畫面一轉，左邊嘅螢幕出現咗兩隻隔空彈撥電線嘅手，而右邊同中間嘅畫面就顯示由曾侯乙墓出土嘅大型編鐘。之後，三個畫面都變成一幕幕核爆場面，一朵朵圓拱形嘅蘑菇雲喺空中升起。然後，有一隻手出現，彈撥結他嘅弦線。跟住，中間螢幕嘅畫面影住一位貌似少數民族嘅女士，佢着住格仔恤衫，喺一個鄉村環境對住紅色嘅手提電話唱歌。左邊嘅螢幕影住呢位女士嘅耳仔特寫，然後，中間螢幕嘅畫面再次切換，沿住一條無任何車輛嘅隧道一路前進，造出嘅效果就好似喺人類嘅耳道穿梭咁樣。

畫面再轉，空曠嘅山頂上有一班人，佢哋全部着住相同嘅民族服飾，圍成一圈，喺度唱歌跳舞。然後，中間嘅螢幕出現咗一個舊式大型音響組合，而左、右兩邊嘅螢幕就以特寫鏡頭影住音響組合上面五顏六色嘅圓形燈，燈光隨住音樂強勁嘅節拍閃耀。之後，畫面切換成電影《第三類接觸》嘅片段：喺荒漠之下，幾百個皮膚顏色較黑嘅人坐喺地上面唱歌，幾十個着住西裝嘅白人就企喺度錄音；跟住，畫面出現地球人同外星人以光同聲音溝通嘅一幕。緊接住嘅場景，係來自另一部電影《星球梭那里斯》嘅片段，男主角描述自己重遇已故妻子嘅經歷，而畫面顯示妻子嘅面貌同衣着不斷變化。

錄像尾聲，出現咗一位女子嘅正面。佢嘅面貌、衣着同髮飾不斷變化，當中包括少數民族嘅裝扮，同埋富未來感、令人聯想到外星種族嘅形象，好似《星球大戰》電影中嘅艾米達拉女王咁。最後，呢啲形象重疊起嚟，女子嘅面目同衣着打扮變得模糊。