劉煒 《1989年生於北京（250%）》

武漠：

您好，我係武漠，M+嘅策展人，而家等我同你哋分享呢幅繪畫作品當中嘅視覺元素，點樣連繫藝術家劉煒創作嗰陣嘅現實世界。

我哋可以見到畫面左上方有四個貌似嬰兒嘅鮮粉紅色不明生物圖像。畫面氣氛詭異、強烈，就好似一場爆炸蓄勢待發。

呢幅畫有好大部分都覆蓋住密密麻麻嘅灰白色塗鴉英文字句 「born 1989 in beijing」，即係「1989年生於北京」，令我哋一次又一次咁默念起嚟，好似喺度不斷提醒自己。喺呢啲文字之間，可以見到嬰兒玩具、斷臂殘肢，仲有不明物體嘅圖像，同嗰四個鮮粉紅色嬰兒嘅身體互相呼應，全部都令人聯想到腐爛嘅肉體。而喺呢啲圖像之間，仲有「250」同「250%」嘅文字，指嘅係中國俗語「二百五」，意思係「白痴」。

藝術家劉煒1989年喺中央美術學院版畫系畢業，同年發生咗天安門廣場事件。當藝術家嘅崇高理想同抱負俾瞬息萬變嘅政治環境推向混沌，劉煒選擇用佢嘅畫作去反映佢所身處嘅現實世界。

對於喺畫面度嘅呢啲符號，每個人、每個時代都有唔同嘅解讀。你又覺得呢啲符號指向啲咩？

旁述：

呢件作品嘅名稱係《1989年生於北京（250%）》，係劉煒喺1997年創作嘅油彩布本，高約150厘米，長298厘米，大細似傳統課堂用嘅黑板。

作品畫面嘅左上角到上方中間位置，有四幅嬰兒肖像並排，全部上半身赤裸，佢哋嘅神情同外觀都有啲怪異，皮膚呈粉紅色，似皮膚燙傷咗嘅顏色，同黑色嘅背景成強烈對比。四幅肖像一共佔畫面約四分之一。畫面其餘嘅四分之三，就佈滿密密麻麻嘅灰白色英文字句「born 1989 in beijing」，底色為深灰色。文字之間隱約可見四、五十個大大細細嘅圖像，包括唔同造型嘅人型公仔、斷臂殘肢、以及貌似生滿肉瘤嘅不明生物，成個畫面睇起嚟密集又凌亂。

畫面左上方嘅四個嬰兒，係藝術家繪畫佢自己嬰孩時期嘅肖像，全部嬰兒嘅樣貌同表情都差唔多，都係光頭圓面，望向左邊，眼睛細小，目光呆滯，嘴巴扭曲，似擘開緊個嘴，但個嘴被聯住咗咁。嬰兒嘅頭同身顯得腫脹變形，兩隻耳仔旁邊似生咗一條條紅色手指，而最右邊嘅嬰兒，膊頭同上臂就似生咗幾舊球狀肉瘤。

作品其餘部分，俾幾百句灰白色嘅細楷英文字句「born 1989 in beijing」覆蓋，意思係「1989年生於北京」。呢啲字句部分互相交疊，顏色有深有淺，字體線條粗度一致，似係用一個噴字模板同噴漆，將字句重複噴滿成個畫面。部分字體清晰可辨，部分就一片模糊。字句之間，遍佈人型公仔、手臂、腳同肉瘤等圖像，大嘅有畫面三分之一咁高，細嘅有半隻成人手掌咁大，佢哋大部分係粉紅色。呢啲圖像有啲被文字覆蓋，有啲就疊喺文字上面。圖像之間嘅空隙，填滿咗手寫嘅數字同標示，包括250、250%同箭嘴等。

成個畫面有一條條黑線同白線，似係繪畫作品用上黑色同白色顏料嘅時候，顏料流淌而下嘅痕跡。