林天苗 《辮》

林天苗：

大家好！我係藝術家林天苗，而家喺北京生活同創作。

旁述：

同林天苗傾計嗰陣，佢為我哋解釋《辮》呢件作品，就係而家喺M+展示响你哋面前嘅呢個裝置。綿線一直都係林天苗好多作品入面嘅重要元素，就好似面前呢張自拍肖像背後拖住嗰啲細線咁，我哋問佢背後嘅原因。

林天苗：

喺1960、70年代，中國大陸嘅生活物資係非常少，幾乎所有嘅衫、被、甚至鞋都需要由家庭主婦自己攪掂。喺我仲好細個嘅時候必定要幫媽媽整理呢啲棉線同毛線，幫輕下佢嘅家務重擔。所以我對無漂染過嘅棉線同毛線材料特別感到親切，於是，選擇用棉線成為好自然嘅事，一啲陌生感都冇。隨住咁多年喺作品裏面深入研究「棉線」，慢慢發現佢嘅可能性係無窮無盡。

旁述：

作品嘅另外一個元素，就係佢自己嘅巨型肖像。呢個係另一個林天苗作品中經常出現嘅主題。佢好耐之前已經對肖像產生興趣，包括佢細個嗰時周圍都見到嘅毛澤東肖像，以至到現代嘅人像攝影。呢啲作品通常會流露相中人嘅政治同社會理念，但係林天苗想將呢啲元素通通拎走。

林天苗：

由於我對「肖像」歷史嘅理解同反思，喺自己嘅藝術創作中就產生咗點樣使用、同埋呈現自己「肖像」嘅靈感同想法，所以覺得用自己身體係會更加準確。我將一切「性別」特徵嘅符號，好似頭髮、化妝、表情都模糊到難以辨認，試圖消除社會、文化、時代賦予個體嘅階級、職業、性別等特殊屬性，只保留全人類共有嘅「自然」本性。

旁述：

呢件作品嘅名稱係《辮》，係林天苗喺1998年創作嘅裝置作品，創作媒材包括印有數碼圖像嘅布、棉線，同埋無聲嘅單頻道彩色數碼錄像。整體約高400厘米，長260厘米，闊1500厘米。

作品中有一塊長方形、帶有數碼印刷圖像嘅布，由天花板垂直離地懸掛，布係淡白色嘅，大約有兩道門咁高、三道門並排咁闊。布上嘅圖像有少少矇，但仍然可以見到係藝術家林天苗正面嘅巨型黑白頭像，頭像佔滿成塊布，佢光頭圓面，令人難以辨別佢係男係女；佢雙眼直視前方，嘴唇緊閉，無明顯嘅表情。

近距離睇，頭像表面佈滿密密麻麻嘅米白色小繩結。小繩結連住一條條米白色幼棉線，穿到布嘅後方，呢啲線數以千計，好似人像後方留有一把白色長頭髮，長髮鬢成一條條小辮，垂落地面，一條條小辮又鬢成一條粗辮，粗辮首先雜亂咁纏繞堆疊，再彎彎曲曲向後延伸，距離頭像愈遠，條辮就愈幼，再變成一條幼棉繩，連到地上一個螢幕。螢幕播放一段無聲嘅數碼錄像，錄像用近鏡拍攝一對手拎住三條幼棉線，將左右兩邊嘅棉線交替扭向中間，同中間嘅棉線交疊，每一次交疊後兩條線對調位置，動作不斷重覆，將三條棉線織成幼繩。睇落就好似呢條辮由巨型頭像延伸好幾十米後，變成幼繩，再連接到螢幕嘅錄像之中。