M+希克藏品（捐贈），香港，©陽江組合，圖片：M+，香港
旁述：
呢件作品嘅名稱係《書法花園》，係陽江組合喺2004年創作嘅裝置作品，物料包括水墨紙本、塑膠樹、木橋、按摩器同閉路電視。作品尺寸視乎展示空間而定。喺2025年開幕嘅「M+希克藏品：心靈圖景」展覽中，作品放喺一個開放式展區展示，觀眾可以喺花園自由穿梭。
陽江組合係由陳再炎、孫慶麟同鄭國谷喺2002年成立嘅藝術團體。佢哋三個人以合作形式進行創作，打破咗傳統書法文化中，將書法視為個人藝術嘅觀念。除咗挑戰文人書畫畀人高雅、權威嘅刻板印象之外，佢哋亦會將日常活動融入作品，傳遞反傳統嘅自由精神。喺《書法花園》呢件裝置作品中，佢哋以假桃花樹同木橋，呈現水墨畫常見嘅桃花源景象。佢哋將一大堆書法作品放喺橋底，意味住書法唔再係高雅藝術；而將作品設置於花園之中，就提醒住觀眾漢字乃源於人類對自然嘅觀察或者體驗。
花園中嘅木橋呈梯形，顏色係淺啡色，高1.8米，長6米，闊度大概足夠一個人行過。橋嘅兩側有欄杆，以方形木條交叉砌成；而欄杆間柱嘅頂部有球狀裝飾。橋嘅兩端亦有梯級，可供觀眾上落。橋底堆滿寫有書法嘅紙，全部都巢𠵼𠵼。紙張嘅顏色有米白、淺藍、粉紅、泥黃，亦有灑金嘅紅色揮春紙。紙上有墨跡同中文字，字體有大有細，有啲字嘅墨水化開、模糊不清。靠近橋底嘅紙微微震動，睇落就好似橋下流動嘅河水。橋嘅旁邊有一部電視機，係一部14吋嘅舊式厚身彩色電視機，電視螢幕直播緊紙堆不斷震動嘅影像。
花園之中有五棵樹，啲樹都比一般成人高，幼身嘅啡色樹幹固定喺三腳架上，樹木無樹根，分枝上有零星幾片綠葉，枝頭開滿顏色深淺不一嘅粉紅色桃花。
喺呢個花園之中，有一座白色瀑布山，係陽江組合喺2003年創作嘅另一件雕塑作品，名為《瀑布》，物料包括蠟、紙同金屬支架。呢座瀑布山有成人咁高，山體表面凹凸不平，遠睇似一座冰山。成座山就好似瀑布嘅水流傾瀉而下，凝結成冰，形成層層疊疊嘅冰瀑。近睇，會見到呢座山係由米白色宣紙紙團堆砌而成，而瀑布就係白色嘅蠟融化、滴落再凝固後造成嘅效果。
觀眾可以穿梭於桃樹之間，或者企喺橋上環視花園四周嘅景色。