王克平 《鏈》

旁述：

呢個木雕塑係王克平嘅作品。佢係著名嘅星星畫會創辦人之一，活躍於1970年代後期至1980年代初，係自學成才嘅前衞中國藝術家。呢個作品以強烈、大膽嘅拳頭作為象徵，直率咁表達咗文化大革命結束後，嗰一代畫家喺相對開放嘅氣氛之中自我表達嘅精神。

攝影師劉香成係1978年首批被派去北京，記錄當時社會變遷嘅八位美國記者之一。

劉香成：

中國喺1978年決定全面落實經濟改革，呢個係一個好偶然嘅時機，當時無論喺社會、文化、藝術等方面都放寬咗好多。所以當中嘅意義相當深遠，因為當時嗰種開放係席捲全國所有範疇。

旁述：

中國社會開放咗，好似星星畫會呢啲團體開始更公開咁向大眾展示何謂藝術自由。劉香成透過採訪，同畫會嘅成員熟咗，我哋問佢點回顧當時呢個風潮。

劉香成：

我覺得大家可以將呢個現象睇成係對當時中國整體狀況嘅反思，因為喺文學、詩歌、藝術、雕塑、繪畫、木刻同埋攝影嘅範疇，都開始變緊。我諗，星星畫會嘅重要性，係向社會宣告：「埋嚟聽吓我哋、望吓我哋啦，睇下我哋做緊啲咩、想做啲咩啦。」

而呢樣喺中華人民共和國係前所未有，因為當時佢哋應該從未見過外國記者。佢哋無諗過有人會對佢哋有興趣，尤其係佢哋嘅個人故事。所以，你可以理解到，星星畫會嘅人，同其他知識分子作家、小說作家等等，開始慢慢窺探到喺圍牆以外嘅世界。

旁述：

呢件作品嘅名稱係《鏈》，係王克平喺 1979年創作嘅木雕，高53厘米，闊37厘米，厚約13厘米。作品嘅高度約莫係成人臀部到頸部咁高，而最闊嘅位置就約有成人膊頭咁闊。

作品係較為抽象嘅人頭木雕。雕像嘅面部側向左邊，好似畀一隻手揜住嘴同下顎。佢嘅頭部向後昂，眼睛擘大，筆直嘅頸部上面纏住一圈環環相扣嘅鎖鏈。

雕像嘅形態好似我哋將左手手背向住自己，握緊拳頭，然後將右手嘅手指合埋，從左手手心嗰邊包住左手尾指下方嘅肌肉同手背。左手被包住嘅地方，就係雕像嘅嘴同下顎。而冇被包住嘅部分，即係左手手背上方嘅手指關節位置，尾指關節就係雕像嘅鼻，食指同中指之間係雕像呈橄欖形狀嘅眼睛。而左手手腕嘅位置，就係雕像刻有鎖鏈嘅頸。

成個木雕係偏深啡色，表面平滑，帶有光澤，有住好似山巒起伏咁嘅木紋。雕像嘅眼睛係以深深嘅刻痕勾勒輪廓。而眼睛下方嘅手，同樣係以刻痕呈現手掌同指甲嘅線條。至於戴喺頸部嘅鎖鏈就微微凸起，好似浮雕咁。