懸浮城巿

旁述：

如果你熟悉香港，呢個矚目嘅裝置可能會幾似曾相識。呢個作品叫做《懸浮城市》，呈現呢度獨特嘅都市基建系統，包括有蓋行人路、天橋、電梯，令人無需要行出戶外或者地面，都可以暢通無阻。試吓望吓周圍，你會見到呢啲基建系統出現喺作品上面嘅錄像。

呢啲影像展示咗幾百萬人每日嘅生活，都係抽取自電影入面，城市人喺唔同嘅行人通道上上落落嘅畫面。其中一段，你會見到由知名電影攝影師杜可風拍攝嘅中環半山扶手電梯。佢已經喺香港住咗幾十年，我哋問過佢點睇呢啲行人路網絡。

杜可風：

你望住人生百態喺眼前流轉，係一個好不可思議嘅畫面。香港有好多地方，人來人往，令你有一種肯定生命價值嘅喜悅。佢哋人人都唔同，做緊唔同嘅嘢，我諗呢個都係拍電影嘅樂趣，就係去觀察同埋讚美。

旁述：

中環半山扶手電梯喺佢嘅早期電影《重慶森林》入面有重要地位，由嗰陣時開始，杜可風已經覺得，呢啲行人通道就係城市嘅脈搏。

杜可風：

呢個真係一個對香港好好嘅比喻，就好似貫穿城市嘅血管。佢係一條血管，但係動脈定靜脈？因為佢來來往往，係咪？嗰陣我啱啱搬咗去一個單位喺正半山行人電梯隔離。我就話：「喂，咪住，呢個咪就係我見過最厲害嘅比喻？」呢個就係香港。呢個係動脈又係靜脈。呢度係西方又係東方。佢哋彼此衝突，又互相依存。

旁述：

呢件作品嘅名稱係《懸浮城市》，係Adam Snow Frampton、Cyrus Penarroyo、Jonathan D. Solomon同汪嘉詠喺2020年創作嘅裝置作品，主要以銀色嘅鋁板同鋁管，仲有白色嘅3D立體打印膠製組件組裝而成，約成人及腰高，長360厘米，闊260厘米。

作品分為底板同高架道路兩部分。底板顯示香港島由上環到金鐘之間嘅平面地圖，上方架空展示一組組連接唔同建築物嘅行人路、扶手電梯、樓梯，同埋天橋，佢哋彼此相接，但剔除咗建築物嘅外形。

底板地圖由六塊正方形銀色鋁板組合而成，板面刻咗上環信德中心到金鐘太古廣場之間嘅道路、地區同地標名稱。喺道路各個對應嘅位置，都會豎起高高低低嘅銀色幼身鋁管，高度由86至115厘米不等。鋁管嘅末端都支撐住一組組3D打印嘅白色組件，呢啲組件呈現出不規則嘅道路形狀，邊線有直有曲，有粗有幼，恍如真實嘅行人道路網絡。道路四通八達，滿佈交匯點，以及連接私人、商業同公共空間嘅地方。

整件作品座地展示，觀眾可以俯視地圖同道路網絡，或者由側面觀察網絡嘅佈局。網絡向外延伸、上下交疊，貫穿唔同空間，就好似人體嘅循環系統中嘅動脈、靜脈同微絲血管，深入身體各處。