何翔宇 《可樂計劃（萃取結晶）》

旁述：

藝術家何翔宇最初將一樽可樂帶到工作室，將可樂煮到淨返固態嘅殘留物，然後佢用咗六個幾月時間，自己一個人煲一噸可樂，但係佢知道咁樣仲係唔夠，於是佢返到家鄉遼寧省丹東市，請咗十個工人，喺一間木材廠入面用年幾時間煮滾一共127噸、即係六萬樽可樂，生產出大批黑色泥狀殘留物，睇起上嚟好似閃閃發光嘅礦石，仲放喺光潔明亮嘅透明箱入面。

可樂喺中國嘅銷售背景令佢成為西方文化同消費主義嘅標誌。1979年，中國經濟啱啱開始對外開放，本來被停售嘅可口可樂重新進入中國市場。呢款紅色包裝嘅飲品喺中國非常受歡迎，愈嚟愈暢銷，甚至成為大家喺日常生活入面無處不在嘅產品。

何翔宇所煮嘅127噸可樂正好等於可口可樂喺佢家鄉嘅年均銷量。而家呢啲數字同佢隱喻嘅消費慾望變成咗實體，震撼咁呈現眼前，咁會唔會令你思考消費嘅真相？

值得一提嘅係，何翔宇喺創作嘅過程入面，需要跳過受跨國公司監管嘅當地代理商去獲得大量可樂，喺製作期間，佢仲需要應對唔同政府部門嘅調查同盤問。佢以呢個項目真實咁介入社會運作，體現咗各種權力嘅複雜關係。

旁述：

呢件作品嘅名稱係《可樂計劃（萃取結晶）》，係何翔宇喺2009至2010年間創作嘅雕塑，創作材料為可口可樂嘅糖分結晶。作品就好似一舊舊黑色嘅泥土，堆放喺一個透明展櫃入面。黑色邊框嘅展櫃離地架高，高120厘米，長400厘米，深100厘米。

可口可樂嘅糖分結晶呈不規則形狀，有部分堆到展櫃一半咁高，形態好似將濕潤嘅泥土，捏埋一舊舊再疊高咁；有部分就凹咗落去，好似泥土中有一個個孔洞。靠近展櫃睇，會見到啲結晶係粒狀沉澱物，主要係黑色，部分位置偏深啡色，夾雜銀色或者白色嘅細碎微粒。企遠睇，成件作品嘅形態就好似喺海邊俾海水侵蝕同風化咗嘅岩石，又或者似不知名嘅巨型黑色礦石。