攝影：林煒然，圖片由M+提供
旁述：
呢件作品嘅名稱係《別碰！》 ，係劉韡 喺2010年創作嘅雕塑，物料包括生皮，即係用嚟製作狗咬膠嘅牛皮，仲有金屬同木。成件雕塑高約2.7米，長4.2米，闊2.3米，同一架貨van差唔多長，但更加高同闊。
作品離地懸掛喺空中，雕塑上半部分係一個好似西藏地標布達拉宮嘅建築群，下半部分係陡峭嘅山坡，至於底部就巖巖巉巉。成件作品睇起嚟，就似一座宮殿連住山體畀人連根拔起，微微離開地面，飄浮於半空。
一排高高低低嘅方形平頂建築，前前後後咁緊密排列，佔據成個山頭。山腳有幾道樓梯，一直向上延伸到山頂，通向宮殿各處。樓梯與樓梯之間有幾座比較矮嘅建築散散落落。宮殿下方，係近乎垂直嘅山壁，山石突出，山脊線銳利分明。
成件作品係由唔同大細同形狀嘅狗咬膠縫製而成。整體呈淺啡黃色色調，質地睇落堅挺粗糙，帶有透光感；而牛皮縫合嘅位置，會見到明顯嘅縫製痕跡。喺山壁上，有幾片白色牛皮，睇落似積雪。仔細啲睇，可以清楚見到每棟建築物嘅外牆，有一個個排列有序嘅方形小窗口；最高嘅建築，有尖頂同類似經幢嘅柱狀結構，仲有圓形雕飾；而山體嘅部分地方，則有縫隙或者穿孔。
藝術家劉韡刻意選用狗咬膠為創作媒介，以呢種質感粗獷又廉價嘅材料，塑造莊嚴雄偉嘅宮殿。佢通過材質同宮殿形象之間嘅強烈反差，思考政治文化符號係點樣建構出嚟。