巴勃羅・畢加索 傻瓜

伍曉銓：

喺西班牙文入面，「bobo」可以解做天真嘅人或者傻瓜。呢個男人著住破舊嘅衫，戴住傳統西班牙絨球帽，遮住佢亂糟糟嘅頭髮。佢拎住一支酒，煎緊兩隻雞蛋，而個鑊啱啱好遮住佢嘅下體。你可以將佢睇成一個無憂無慮嘅樂天派，肆無忌憚，唔受社會規範。佢似乎對手上嘅食物同飲品覺得非常滿足。

不過，佢亦都好似宮廷小丑同矮人 。兩者都係西班牙文藝復興時期，好受歡迎嘅宮廷畫題材。宮廷小丑係達官貴人嘅表演者或者侍從，往往不被重視。但係亦都因為地位特殊，而獲得更多嘅自由甚至特權。可能，畢卡索喺研究傳統矮人肖像畫嘅時候，從佢哋無憂無慮嘅藝人角色當中，亦都感受到了一種聯繫。

旁述：

呢幅畫嘅名稱係《儍瓜》，係巴勃羅．畢加索喺1959年創作嘅油彩同瓷漆布本作品，高92厘米，長約73厘米。

作品用黑色線條描繪一個坐喺地上、着得破破爛爛嘅男子，一隻手拎住支酒，一隻手拎住個平底鑊煎雙蛋。男子頭戴一頂黑色闊邊大帽，面容扭曲咁笑。佢身旁有樹，背後係灰濛偏綠嘅天空，同埋暗綠色、頂部帶白色嘅遠山。

作品約半道門咁高，畫中男子幾乎佔滿整個畫面，佢擘大雙腳，一隻腳棟高，赤腳坐喺泥地上面。佢身上嘅白色衫中間敞開，露出胸口、肚臍同下體，一邊膝頭由穿窿嘅衫腳或者褲管度凸咗出嚟。佢一隻手揸住深酒紅色嘅樽，另一隻手揸住黑色嘅圓形平底鑊。個鑊垂喺男子下體前面，遮住咗佢嘅陰莖後端同睪丸，陰莖前端就露咗出嚟。平底鑊個面向外，鑊中有兩隻太陽蛋，啲蛋嘅位置睇落似係男子嘅兩粒睪丸咁。男子面色紅潤，臉頰帶紅暈，一隻眼低一隻眼高，鼻孔朝天，嘴角兩邊向上，露出白色嘅牙齒。一頂黑色大帽壓住佢一頭散亂嘅黑色短髮，帽嘅上方似翻起嘅帽邊，而兩側嘅帽邊分別向左右外伸；帽邊有三粒黑色絨球，點綴喺帽嘅上方同兩側。

男子兩旁，有啡色樹幹同零星綠葉。佢後方有深綠色嘅遠山，山頂有幾道白色嘅筆觸，似係白雪覆蓋嘅景象。雪山上方嘅天空色調偏綠，略帶灰濛。