巴勃羅・畢加索 海邊的人像

伍曉銓：

試想像自己喺海灘漫步，望住遠處兩塊曬緊太陽嘅巨石。巨石似乎因為風吹過同海水沖刷過，變得光滑，幾乎同周圍嘅沙融為一體。但走近啲睇，你會慢慢見到交纏嘅身體部位：手、腳、胸、嘴、脷、眼，全部用引人遐想嘅姿勢扭曲埋一齊。

呢幅畫叫《海邊的人像》，係畢加索筆下嘅人體遊樂場。唔似佢其他嘅立體主義作品，呢度嘅人物互相纏繞，營造出一種感性而親密嘅場景。對畢加索嚟講，人體就好似雕塑家手上嘅柔軟黏土，可以搓圓撳扁。佢能夠將複雜嘅情感融合於抽象嘅形狀，挑戰我哋對人體描繪嘅既定觀念。

1931年夏天，畢加索喺佢位於法國蔚藍海岸嘅度假屋，創作咗呢幅畫。佢利用嗰度寬敞嘅空間，設立咗一個工作室去造大型嘅雕塑。呢一幅畫描繪緊一個虛構出嚟，喺海邊嘅巨型雕像，係繪畫同雕塑試驗之間嘅對話，展示咗畢加索對跨媒介嘅反覆思考。

旁述：

呢件作品嘅名稱係《海邊的人像》，係巴勃羅．畢加索喺1931年創作嘅油畫，高130厘米，長195厘米，大概等於一道橫放嘅門咁大。

作品描繪兩個抽象嘅人形，喺沙丘上攬埋一舊。人形位於畫嘅近景，以一塊塊泥黃色嘅長條形、球形同弧形組合而成。四隻長條形嘅腳互相交纏，一對球狀嘅乳房彷彿從身體分離，夾喺兩個人形嘅肢體中間。肢體上方各有一個半球形，似係佢哋嘅頭。球形凹咗入去，就好似擘開嘴，向對方伸出錐形嘅脷。人形嘅肢體加咗陰影，顯得立體飽滿。畫嘅中景係一片沙黃色，似係沙灘。而遠景有兩道橫向嘅藍色，上方嘅淺藍色似係天空，下方嘅彩藍色似係大海。

畫面中央嘅沙丘上，堆疊咗一堆形狀，仔細睇，就會見到左、右好似各有一個人，互相糾纏。右邊嗰個人嘅身體以彎曲嘅長條形構成，佢好似側身坐喺沙丘，微微向後挨，突出圓潤嘅臀部。佢一隻腳向上舉高，另一隻腳伸向左邊嘅人。而左邊嗰個人嘅身體好似一粒巨型腰豆，佢擺出類似半踎嘅姿勢，跪喺另一個人嘅兩腿之間。佢伸出手臂，觸碰右邊嗰個人嘅頭頂。兩個人嘅頭部都呈現向內彎嘅弧形，弧形上方似係鼻哥，向內彎嘅部分有一個又長又尖嘅形狀凸出嚟，好似兩個人面向對方、擘大口伸脷。弧形下方似係下巴，兩個人嘅下巴互相貼住。弧形嘅表面即係人形塊面，右邊嗰個人塊面有兩條彎曲嘅弧線，一上一下，似係眯埋咗嘅眼睛。而左邊嗰個人塊面有兩個並排嘅黑色圓點，似係一對小眼睛。兩個人嘅肢體之間，夾住兩個圓球，球上各有一個好似凸起咗嘅圓點，好似一對渾圓嘅乳房。

沙丘後面係沙黃色嘅沙灘。沙灘右邊有兩個白色色調嘅長型色塊，分別似係尖頂同平頂嘅建築物。遠處嘅沙灘後方係一大片蔚藍色，睇落好似平靜嘅大海。而海平面上嘅天藍色，就似萬里無雲嘅晴空。