王克平 《拳頭》

旁述：

呢個木雕塑係王克平嘅作品。佢係著名嘅星星畫會創辦人之一，活躍於1970年代後期至1980年代初，係自學成才嘅前衞中國藝術家。呢個作品以強烈、大膽嘅拳頭作為象徵，直率咁表達咗文化大革命結束後，嗰一代畫家喺相對開放嘅氣氛之中自我表達嘅精神。

攝影師劉香成係1978年首批被派去北京，記錄當時社會變遷嘅八位美國記者之一。

劉香成：

中國喺1978年決定全面落實經濟改革，呢個係一個好偶然嘅時機，當時無論喺社會、文化、藝術等方面都放寬咗好多。所以當中嘅意義相當深遠，因為當時嗰種開放係席捲全國所有範疇。

旁述：

中國社會開放咗，好似星星畫會呢啲團體開始更公開咁向大眾展示何謂藝術自由。劉香成透過採訪，同畫會嘅成員熟咗，我哋問佢點回顧當時呢個風潮。

劉香成：

我覺得大家可以將呢個現象睇成係對當時中國整體狀況嘅反思，因為喺文學、詩歌、藝術、雕塑、繪畫、木刻同埋攝影嘅範疇，都開始變緊。我諗，星星畫會嘅重要性，係向社會宣告：「埋嚟聽吓我哋、望吓我哋啦，睇下我哋做緊啲咩、想做啲咩啦。」

而呢樣喺中華人民共和國係前所未有，因為當時佢哋應該從未見過外國記者。佢哋無諗過有人會對佢哋有興趣，尤其係佢哋嘅個人故事。所以，你可以理解到，星星畫會嘅人，同其他知識分子作家、小說作家等等，開始慢慢窺探到喺圍牆以外嘅世界。

旁述：

呢件作品嘅名稱係《拳頭》，係王克平喺1981年創作嘅木雕，高56.5厘米，長26厘米，闊15厘米。

呢件木雕作品上方係一個啡黑色嘅拳頭，約佔成件作品嘅三分之一咁大，拳頭下方連住前臂。拳頭緊握住一個赤裸嘅人體，睇落似女性身體，約莫拳頭一半咁大，呈淺啡色。

作品嘅形態就似成人右手握拳，掌心向住自己，舉起拳頭。按比例前臂睇起嚟較為瘦削，顯得握住拳頭嘅手指粗壯結實。手指下方有幾個圓球狀同長橢球狀，佢哋排列出嚟嘅形態，就似一個豐滿嘅女性胴體，拳頭就如緊握住呢個胴體，但唔見頭、面、雙臂同小腿，只露出赤裸嘅上身同下肢。拇指對落係一對渾圓豐滿嘅乳房，下方圓鼓嘅腹部近乎係一個半球體，下身兩條圓潤嘅大腿緊緊合埋，屈曲向左。呢個女性胴體彷彿頭部被大拇指捏向後壓住，雙臂同小腿同樣被強行屈向後。

拳頭同前臂啡黑色嘅表面刻滿鱗片狀嘅小坑紋，凹陷嘅位置呈暗啞嘅炭黑色，似被燒過，睇起嚟凹凸不平。女性胴體表面凸出嘅部分打磨光滑，喺光線下睇似黃銅。粗糙嘅拳頭同光滑嘅女體喺顏色同質感上構成強烈對比。