Tiffany Chung 《漂泊者》

Tiffany Chung：

Hi，我係Tiffany Chung，係一位美藉越南裔視覺藝術家，我依家住喺德克薩斯州嘅休士頓。

宋氏春：

大家好，我係宋氏春，我嚟自越南，後來坐船嚟到香港，嚴格嚟講，我好多年前係一名船民。

旁述：

Tiffany係創作呢件大型作品《漂泊者》嘅藝術家。呢個作品探討越戰結束之後，越南難民漂洋過海嚟到香港嘅困境，同時挑戰我哋對現代人口遷徙嘅固有睇法。多年嚟，香港對好多「越南船民」嚟講，都係「第一收容港」。但係，政府最終宣佈喺1988年6月16日之後唔再為佢哋提供庇護。

宋氏春依家係一名人權律師，曾經亦係一名難民。佢同家人就係差少少，錯過咗抵港嘅最後限期，從此徹底改變咗佢哋嘅生活。

宋氏春 ：

好唔好彩，我哋喺最後限期之後兩個月先嚟到香港，我哋隻船俾人攔截，然後被拘留，等候審查。由1988年到1996年底，我被拘留喺唔同嘅難民營，所有都係禁閉式。所以，我十歲開始，到十八歲左右，總共超過八年都喺禁閉營渡過。

旁述：

呢件作品做咗好多檔案研究，亦用咗唔同嘅媒介去呈現，但Tiffany好想我哋注意嘅，係穿插喺作品中、非常有力量嘅水彩畫。

TIFFANY CHUNG：

呢啲水彩畫，係我用多年嚟收集嘅真實檔案圖片去創作嘅，我委託咗喺越南西貢嘅年輕畫家將呢啲圖片重新畫成水彩畫。咁樣做，係因為呢段歷史喺越南嘅官方歷史中已經被抹去，被遺忘喇。冇人會再喺公共場合公開討論呢件事，學校亦都唔會教。所以，我試圖令年輕嘅越南人重新認識呢段歷史。

宋氏春：

當我睇到Tiffany嘅圖片同繪畫嗰陣，我已經眼濕濕。呢啲圖畫重現咗我哋以前嘅生活，令我諗起難民營裏面嘅環境係幾咁惡劣。呢個作品真係好重要，佢證明咗我哋曾經係咁樣生活，亦提醒大家一個事實，就係呢啲事曾經發生過。 呢啲畫所描繪嘅同發生過喺我哋身上嘅事係無分別。

旁述：

Tiffany反思呢個作品最重要嘅訊息，就係點樣令難民同移民呢啲議題，响今日引起更廣泛嘅討論。

TIFFANY CHUNG：

我諗某程度上，大部分人會認為呢啲人係被迫遣返嘅受害者。但另一方面，你又可以將佢哋睇成為真正掌握自己命運嘅人，佢哋冇認命，亦冇被其他人左右佢哋嘅人生。

我哋希望觀眾可以睇到一樣嘢，難民唔只係受害者，佢哋嘅旅程比我哋想像嘅更加勇敢。面對羈留營嘅可怕生活同埋強迫遣返，佢哋都作出反抗：證明佢哋嘅政治能動性可以重塑當下難民嘅論述。

旁述：

呢件作品嘅名稱係《漂泊者》，係Tiffany Chung喺2015至2016年間創作嘅裝置作品。創作媒介包括水彩、墨水同塑膠彩紙本、亞加力膠板，以及彩色、有聲嘅雙頻道數碼錄像。作品尺寸視乎展示空間同裝置方式而定。

作品包括二十八幅畫，按時序喺牆上由左至右、上下錯落咁展示。喺畫作與畫作之間，有一塊塊唔同顏色嘅長條形膠板。每塊透明膠板上，都以英文註明1974至1994年間嘅某啲日子，以及當時發生嘅事。而紅色、藍色同灰色嘅膠牌，就有大楷英文寫住一啲單字或者短句。

畫作之中有黑白，亦有彩色。每一幅畫描繪一個場景，呢啲場景發生喺1974至1994年間，全部都同越南難民有關，例如：難民抵達香港，密密麻麻嘅船堆滿船塢；貨輪同漁船嘅甲板上，逼滿數以千計嘅人。部分畫作描繪羈留中心裏面嘅生活，有啲難民目光呆滯、沒精打采，亦有啲難民面帶笑容。另有部分畫作描繪難民營內難民抗議、騷動、被警察制服，同埋營房通天大火嘅情景。亦有畫作描繪有人離開即將關閉嘅羈留中心嘅一刻，以及市區天橋底露宿嘅景象。

呢組作品另外仲有兩個螢幕，各獨立展示一段數碼錄像。其中一段片長1分36秒，記錄幾位講越南語嘅人重訪萬宜羈留中心附近嘅萬宜水庫，喺車內由下向上望，望住用石頭砌成嘅水壩，重塑佢哋回憶中羈留中心嘅周邊景象。另一段片長4分58秒，記錄三位講越南語嘅女士重訪望后石越南難民中心舊址，喺正在施工嘅地盤外圍回憶往事。