M+希克藏品（捐贈），香港，©艾未未，攝影：鄭樂天。圖片由M+提供
旁述：
呢件作品嘅名稱係《碎片》，係艾未未喺2005年創作嘅裝置作品，物料係鐵梨木。整體高約4.9米，長8.7米，闊6.5米。
離遠睇，作品似一片「叢林」，林中有十一棵大樹，樹幹粗壯，無樹根，樹枝光秃無葉，當中有兩條樹幹特別高，直指向天。而喺樹嘅頂部，橫放咗一條粗壯嘅木頭，跨越「叢林」兩端。呢啲樹木組合起嚟嘅形態，就好似一班人向上張開雙臂，手拖手圍成一圈。
靠近睇，會發現樹幹同樹枝係由古廟嘅樑柱、殘件同埋傢俬裝嵌而成，接駁位置有一凹一凸嘅榫口，同埋用嚟固定嘅木條。部分樹幹旁邊擺放咗完整嘅中式長方形木檯同高背木凳。仔細睇，呢啲傢俬彷彿從樹幹自然生長出嚟，又似係樹木生長嘅時候連埋傢俬一齊包覆。喺「叢林」旁邊，有另外兩張連埋一齊嘅圓凳；呢兩張圓凳無椅背，一張平放喺地面，另一張打斜放，椅腳離地，睇起嚟好似生長喺「叢林」外嘅小樹。
作品中嘅古廟殘件同傢俬，象徵住中國傳統文化嘅碎片。「叢林」中，會見到帶有木紋嘅深啡色樹幹同傢俬，喺歲月嘅洗禮下，出現破損同磨蝕嘅痕跡，同時亦會見到舊物原有嘅雕花同接合嘅榫位。試吓幻想由高處俯瞰呢片「叢林」，會發現佢嘅輪廓好似一隻公雞，猶如中國版圖嘅形狀，而「叢林」中最高嗰棵樹正正標記住北京嘅位置。藝術家運用傳統木工技術，將呢啲碎片重新建構成睇落隨意、但暗藏巧思嘅新景觀，從中探索新舊文化之間嘅界限同可能性。