「M+希克藏品：心靈圖景」展覽現場，2025年。圖片由M+提供
旁述：
呢件作品嘅名稱係《銀河》，係倪有魚喺2008至2011年期間創作嘅裝置作品，尺寸視乎展示空間而定。喺2025年開幕嘅「M+希克藏品：心靈圖景」展覽中，作品放喺其中一個展區嘅角落位置展示。創作物料包括塑膠彩手繪金屬硬幣，同埋單頻道數碼錄像。硬幣有大有細，直徑約兩到三厘米不等。錄像彩色、有聲，片長約十二分鐘。
展區角落嘅黑牆上，滿佈大約三百個大大細細嘅銀色同黃銅色小圓片。離遠睇，就好似銀河中一顆顆閃爍嘅星星。黑牆嘅最右邊有一個細螢幕，播放住《銀河》嘅創作過程紀錄片。片中以特寫鏡頭拍攝藝術家喺戶外樓梯間，用鎚仔將金屬硬幣敲打成薄片，亦展示藝術家喺簡樸嘅工作室內，用極幼細嘅毛筆沾上黑色塑膠彩，喺硬幣表面一筆一筆描畫前景嘅樹木、中景嘅河岸景色，再繪上遠景嘅崇山峻嶺。
藝術家反覆敲打唔同國家嘅硬幣，將硬幣表面原有嘅面值刻記磨平，徹底消除硬幣嘅經濟價值，令到佢哋變成一塊塊只有磨擦同撞擊痕跡嘅小圓片。然後，藝術家喺呢啲小圓片上，以極精細嘅筆觸繪畫圖案，為小圓片創造新嘅藝術價值，藉此思考人類嘅介入係點樣改變事物嘅價值。
每一枚硬幣嘅表面都係一個微縮嘅景觀，當中蘊含水墨畫常見嘅元素，例如岩石旁嘅曲折小橋、山崖柳樹下嘅瀑布、層層山石間嘅河谷、園林中嘅亭閣、蓮花、松柏同鳥獸。另外，亦有生活化嘅圖像，包括人像、盆景、繡花鞋、中式器皿同傢俬等等。所有圖案嘅輪廓分明，筆觸細膩，線條同紋理清晰可見。單獨咁睇每塊小圓片上嘅景觀，就好似用望遠鏡眺望風景。如果將成組作品連埋一齊睇，就好似浩瀚嘅宇宙入面有一個個定格嘅星球，每個星球都存在喺自己獨特嘅時空之中。