巴勃羅・畢加索 山羊頭顱、瓶子和蠟燭

馮樂山：

你望吓呢啲耐人尋味嘅物件：一個山羊嘅頭骨、一個樽同一支蠟燭。兩樣日常用品，竟然同有啲陰森、令人毛管戙嘅頭骨擺埋一齊。更令人好奇嘅係，畢加索為咗呢個主題做咗兩個版本，一個係畫作，一個係雕塑，兩樣都可以喺呢度睇到。究竟呢個畫面有咩迷人之處，一再吸引畢加索呢？

畢加索喺1951年開始創作呢個雕塑，然後先喺1952年完成畫作，再喺1953年完成雕塑。點解佢嘅創作過程會係咁跳嚟跳去？畢加索曾經講過：「雕塑係畫家對繪畫最好嘅註解。」就好似變魔術咁，畢加索成功將佢對形狀同視點嘅諗法，從平面畫作帶入現實世界。

我哋先睇吓幅畫。留意下左邊嘅圓身花樽，喺上面嗰啲尖角線條襯托下特別顯眼。當你向下望，嗰個花樽就好似用石頭雕刻出嚟咁立體。

而家我哋望向雕塑。即使佢係實體物件，但個花樽比起畫面裏面嘅扁平得多。你可以想像畢加索有幾咁滿足，佢用呢兩件作品改變我哋對現實嘅感知，喺畫裏面構造出豐滿嘅形體，而佢嘅雕塑反而將真實物件壓扁。佢嘅招數仲唔止咁。睇吓雕塑入面嗰對羊角，佢哋其實仲係單車嘅手柄嚟架！

旁述：

呢兩件作品嘅名稱都係《山羊頭顱、瓶子和蠟燭》，係巴勃羅．畢加索喺1951至1953年間創作嘅油畫同雕塑。油畫高89厘米，長116厘米。雕塑嘅物料係上色青銅，高79厘米，長93厘米，深54厘米。

油畫同雕塑都以深沉嘅灰色為主調，都有山羊頭顱骨、樽同燭光三個元素。喺呢兩件作品中，呢三個元素排列嘅位置相同，最右邊係山羊頭骨，最左邊係長頸樽，樽口有一枝發出光芒嘅蠟燭。睇起上嚟，就好似畢加索係照住油畫中平面嘅物件，塑造成立體雕塑，又或者照住雕塑嘅立體物件，畫成平面畫作咁。

呢幅喺1952年創作嘅油畫，畫中嘅山羊頭顱骨，闊度同高度佔畫面約三分之二空間，個樽連埋蠋光，就同頭骨差唔多高。個山羊頭骨面向住左邊嘅樽，頭骨線條利落，加上表面白色同深灰色嘅顏色對比強烈，令頭骨嘅輪廓顯得好突出。頭骨頂有曲折嘅角，向右上下彎曲。一對眼窿喺頭骨中間上下並排。眼窿下係顎骨，有四隻牙齒喺下顎前端。畫中嘅樽似喺一個長方體，雕鑿出個樽嘅長頸同樽身飽滿嘅輪廓，樽頸口似有一截小柱向上伸出，柱頂一條條短小嘅光線散射出嚟，長三角形嘅光束，由左上角嘅小柱頂照向羊頭骨嘅額頭位置。

而呢件喺1951至1953年期間創作嘅雕塑，佢有長方形嘅底座，右邊嘅山羊頭骨闊度佔底座約三分之一嘅空間，高度約係左邊個樽嘅一半高。長形嘅骨頭表面粗糙，嘴朝向左下方，見到眼睛係圓珠狀，一對羊角向上彎，形狀就似單車手把。左邊嘅長頸樽，係由兩塊棟起嘅扁平青銅片相交組成。從正面睇，樽身右邊嘅膊頭位呈弧形，左邊嘅膊頭位就起角，而樽頸左邊有一個起角嘅圈。喺樽口，有一粒球狀物件，佢嘅表面圍住廿幾條幼細嘅青銅枝條，枝條有長有短，向外散開。