常徐功 《賺錢了》

旁述：

呢件作品嘅名稱係《賺錢了》，係常徐功喺2000年創作嘅刺繡作品，物料包括絲綢同人造絲刺繡棉布，高2米，闊1.6米，大約一道門咁大。

作品正中位置有兩男一女，三個人都係黃皮膚、黑頭髮，着住金光閃閃嘅服飾，散發住一股濃郁嘅俗氣。佢哋三個生得好似樣，一對睇落似五六十歲嘅男女坐喺前方嘅紅凳上，而一位較年輕嘅男士就企喺佢哋背後，畫面睇落似係一家三口嘅全家福。

三個人都有粗眉、單眼皮同豬膽鼻，佢哋面容飽滿，面色紅潤，笑容滿面咁望向前方。坐喺左邊、露齒微笑嘅女士似乎係媽媽，佢梳咗一個貼服嘅髮型，前蔭三七分界，髮鬢繑喺耳仔後面；佢着住桃紅色衫配綠色褲，衫上嘅領口同袖口以金黃色嘅絨毛裝飾；佢雙手抱住一隻白色小狗。而坐喺右邊、稍為拘謹但又不失禮貌咁露齒笑嘅男士應該係爸爸，佢留住平頭黑色短髮，髮線好高，露出寬闊嘅額頭，上唇同下巴有鬚根；佢上身着住紫色西裝褸，心口袋露出一條白色袋巾，褸入面襯咗一件青綠色恤衫同帶有波點嘅紅色領呔，而下身就着住米白色西褲；佢右手拎住一支有線咪，中指戴住一隻翠玉戒指。至於企喺兩人身後、位居正中嘅男士，似係呢對夫婦個仔，佢有圓面、細眼同厚嘴唇，面帶含蓄嘅笑容，睇落敦厚老實；而佢前額嘅蔭有幾執鮮色挑染，同佢樸實嘅外貌形成對比；佢着寶藍色西裝褸，心口袋同樣有條白色袋巾，褸入面係白恤衫，配襯紅色領呔同埋啡色西裝背心。父母嘅頭部，同埋阿仔上半身嘅周圍，都以白色同金黃色圍邊，好似佢哋頭上有光環咁。畫作嘅背景以放射形狀嘅線條描繪，彷彿以三人為中心，向外散射出一道道淡橙色、淡紅色同寶石綠色嘅光線咁。

呢件作品運用手工精細嘅刺繡，刻畫呢幾位人物嘅外貌特徵、衣飾嘅質感同背景嘅光影變化，層次豐富鮮明。藝術家常徐功僱用工匠製作呢件作品，透過刺繡呢種民間工藝，配搭鮮艷奪目嘅色彩，塑造出農民富裕嘅形象，藉此探討擁有物質財富嘅同時，精神係唔係同樣獲得滿足。