梁慧圭 五金店拼貼

馮樂山：

你而家睇到嘅鎚仔、工具箱、電動工具同水池，係喺五金舖產品目錄度剪落嚟。當藝術家梁慧圭初初由韓國搬到嚟德國，佢淨係識講基本嘅德文。而佢學呢個語言嘅其中一個方法就係睇呢啲目錄。簡單直接嘅文字同圖片，對佢嚟講係非常好嘅學習工具。

呢啲商業產品好似冇咩特別好睇，但係梁慧圭長時間接觸呢啲相片之後，決定用一系列拼貼嚟捕捉佢哋嘅美。拼貼係將細碎材料編排同黏貼喺平面上嘅藝術形式，由畢加索同喬治．布拉克喺二十世紀初開創。拼貼喺當時係流行嘅消遣活動，係畢加索同布拉克首先將佢帶入美術嘅領域。呢個舉動為藝術家打開大門，就好似梁慧圭咁，運用呢種手法去探索形形色色嘅主題。

旁述：

梁慧圭有一系列以拼貼產品圖錄嘅圖像嚟創作嘅紙本作品。其中四幅喺2013年創作嘅作品，物料都係五金店圖錄中嘅圖像同玻璃硬紙片，高約50厘米，長約69厘米。

四幅作品嘅名稱分別係《五金店拼貼──黑爾韋格牌水池 #1》、《五金店拼貼──包浩斯牌工具箱 #1》、《五金店拼貼──包浩斯牌電動工具#1》同《五金店拼貼──包浩斯牌錘子和槌子 #1》。每幅作品，都係以五金店圖錄入面同類物品嘅圖像拼合而成，物品包括水池、工具箱、電鑽，同埋各種鐵鎚木槌。作品嘅圖像，有啲係集中成球狀或者對角大斜線，有啲就分散交疊喺成個畫面。喺全黑或者金屬色嘅背景中，彩色嘅圖像特別突出，帶有動感，例如：一個個水池好似喺度飄流、一個個打開嘅工具箱就似連成一串喺遠處飛埋嚟、一個個電鑽合體成一個機械人咁懸浮喺空中、一堆槌仔黐埋一舊，成為球狀迴轉滾動。以下係其中兩幅作品：

作品《五金店拼貼──黑爾韋格牌水池 #1》，有26個圓形同橢圓形嘅座地水池圖像，錯落分佈喺成個畫面，水池圍板嘅外側分別係啡色、純白色、藍色或者白底黑紋，似係用木材、石頭或塑膠製嘅產品，當中嘅款式有多邊形同圓形。款式有啲係重複嘅，形狀有大有細，大嘅有手掌咁大。每個水池都有大人同細路喺度玩水，淺藍色或淡綠色嘅水去到佢哋嘅腰或者心口位置。喺全黑嘅背景中，呢啲水池顏色對比強烈，醒目突出，就似一隻隻船喺度飄流碰撞。

作品《五金店拼貼──包浩斯牌錘子和槌子 #1》，係以幾十把圓頭圓尾嘅木槌同圓頭尖尾嘅鐵槌交疊埋一齊，組成一個球狀，直徑有半幅作品咁長，喺畫面中央偏右近底邊位置。啲鐵槌同木造槌嘅頭有灰白色同金屬黑色，手柄係白色、紅色或者木材嘅棕色。佢哋全部手柄向內，槌頭向外，睇起嚟，就似一個球形物體散射出尖刺，喺紅銅色嘅背景中翻滾。