嚴迅奇 香港特別行政區政府總部（2007至2011年）

嚴迅奇 ：

我一直相信，建築師最好嘅作品一定係喺佢最熟悉嘅地方起嘅。尤其身處都市嘅藝術工作者，講緊大部分當代嘅建築師都係，因為對於我嚟講，建築從來都唔只係關於你個座建築物，佢係一大幅砌圖嘅其中一塊。開始設計之前，你要問個城市佢想要啲點樣嘅建築，城市先行，建築為後。

旁述：

佢係嚴迅奇，係香港政府總部嘅建築師。要設計呢座同城市肌理有密切關係嘅重要地標，過程係點嘅呢？

嚴迅奇：

呢個項目有一個我哋要注意嘅重點：呢個係一個政府總部。 唔係好多建築物可以係政府總部。我哋要思考一個點樣嘅形象先至合適地代表到香港人對政府嘅期望。

我哋一開始嘅目標唔係要「標誌性建築」。我哋係想去營造一個標誌性嘅地方，所以先有呢個精簡嘅概念陳述：呢個項目象徵「門常開，地常綠，民永繫」。

「門常開」其實代表咗香港嘅重要特性。呢度係一個開放社會，接受同融合嚟自世界唔同地方嘅人同埋文化。同時，政府都應該時常追求開放，保持開明同埋透明度，就係講緊呢種開放性。

「地常綠」係呢個大樓設計嘅重要元素，一個綠色地帶會喺中央貫穿高樓，將市中心同未來嘅海濱連結。綠色，當然就係代表咗我哋要持續發展嘅願景。

「民永繫」嘅意思係綠色地帶將人流連繫起嚟，無論你係大樓用家、訪客定純粹過客，你都可以全天候廿四小時，輕易咁由城市中心行去海邊。你可以一邊享受呢個空間，一邊欣賞周圍嘅環境同呢個包含各個政府部門、結構獨特嘅大樓。

所以「門常開，地常綠，民永繫」，完全可以將公民價值同理想城市呈現出嚟。

旁述：

香港特別行政區政府總部（2007至2011年）研究模型，係嚴迅奇同許李嚴建築師事務有限公司喺2011年製作嘅建築模型，高44.5厘米，長91.2厘米，闊136厘米，媒材包括紙板同亞加力。

呢個模型係一個建築群，座落喺金鐘海富中心同中西區海濱長廊之間。建築群大致分為三個部分：由海濱長廊望向海富中心方向，左邊嘅部分係立法會綜合大樓，中間係政府總部，右邊係行政長官辦公室。建築群四面被馬路圍繞，以平面圖形式用黑色幼線繪畫。喺建築群後面嘅係夏慤道，左邊係添美道，前方臨海係龍和道，右邊就係添華道。

至於模型嘅立體部分，最後方係金鐘海富中心嘅天橋，天橋連接政府總部。喺總部前面，左邊係立法會綜合大樓，右邊係行政長官辦公室。貫穿建築群中間嘅係添馬公園，一直延伸到模型最前方臨海位置，跨過龍和道，連接中西區海濱長廊。

海富中心嘅天橋分岔成兩邊，連接政府總部建築群，從上而下望，好似一個空心嘅水滴形狀。建築群中最高嘅建築物係政府總部，俗稱「門常開」，佢外形似一道打開咗嘅門，呼應「門常開」呢個設計概念。總部分東翼同西翼，形態就好似豎起兩隻手掌，掌心相對，右手稍為升高，屈曲手指，平放喺左手指尖上，右手係西翼，外牆係淺藍色；左手係東翼，外牆係深灰色，左手手背後面嘅位置係東翼前地，俗稱「公民廣場」；掌心之間嘅下方就係添馬公園嘅起始點。添馬公園主要有兩條行人通道，由政府總部開始向往維多利亞港分岔，似英文字母A字嘅兩劃斜劃。連接住兩條通道嘅，係四條排成閃電形嘅小徑，同埋一條橫向小路。

建築群左邊嘅立法會綜合大樓，分為辦公室樓同議會樓。左邊係辦公室樓，外牆係深灰色，高度大約有政府總部嘅一半，喺上方向下望，可見大樓好似阿拉伯數字嘅「7」字。右邊嘅議會樓高度大概係辦公室樓嘅一半，由一個長方體同一個圓柱體建築拼合而成。外牆磨砂透光，可以見到建築物內部，長方體嗰邊嘅樓頂以綠色標示綠化設計。

至於建築群右邊嘅行政長官辦公室，高度同立法會綜合大樓議會樓差唔多，形狀好似一個巨型貨櫃，向海嘅一面外牆全透明，頂層同埋面向添華道嘅一面外牆係綠色同透明物料相間，隱約可見內部結構。