巴勃羅・畢加索 為〈格爾尼卡〉而作的馬頭草圖

馮樂山：

喺黑色背景襯托下，呢隻馬神情綳緊，吸引我哋嘅注視。佢似乎喺度對住天空大聲嘶叫，條脷好似一把短劍咁伸出嚟。

馬係畢加索反覆描繪嘅主題，喺度，你可以見到佢再次用呢個主題，去回應戰爭造成嘅破壞。1937年，納粹德軍喺佛朗哥政權嘅支持下，轟炸西班牙嘅城鎮格爾尼卡，令到幾百個平民受傷甚至死亡。呢次襲擊嘅新聞好快就傳遍成個歐洲，而畢加索知道呢個消息之後非常傷心。為咗回應呢件事，佢開始創作一幅巨型畫作，《格爾尼卡》就係咁樣誕生。喺唔夠六個星期之內，畢加索畫咗接近五十幅預備草圖，入面至少有十二幅係試畫馬嘅習作。呢幅就係其中一幅，展示咗畢加索嘅創作同試驗過程。

今日，《格爾尼卡》係畢加索嘅知名畫作之一，見證咗戰爭嘅恐怖，更加成為反抗法西斯主義嘅象徵。

如果想了解更多關於《格爾尼卡》嘅故事，歡迎觀看喺你身後面嘅影片。

旁述：

呢件作品嘅名稱係《為〈格爾尼卡〉而作的馬頭草圖》，係巴勃羅・畢加索喺1937年創作嘅油畫，高65厘米，長92厘米。

作品以黑白灰為主調，背景全黑。畫嘅左邊到中間位置，以灰白色描繪咗一個馬頭，同黑色嘅背景形成強烈對比。馬嘅五官以流暢嘅弧線勾勒，佢仰頭望天，擘大嘴，伸長條脷，瞪大雙眼，佢嘅口、鼻同牙齒好似畀人向外拉扯，因而變形扭曲。

呢隻馬岳高頭，擺出三七面對住我哋，瞪大一對圓圓嘅小眼睛，帶方角嘅額頭上豎起一對尖耳，面頰鼓脹飽滿。佢朝向天嘅鼻比額頭仲要闊，漆黑嘅鼻窿撐到眼睛嘅四倍咁大。鼻嘅下方係擘到好大嘅嘴，佔成個馬頭嘅一半咁大，大口裏面露出上顎同埋呈錐形嘅尖脷。佢嘅上顎有四隻白色嘅牙，每隻都有半個鼻窿咁大，全部向外哨，睇落好似生喺鼻嘅右邊咁；而佢嘅下顎位置有另外三隻白色嘅牙。佢嘅下巴同鼻上面，就以白色筆觸描繪細密嘅毛髮。

馬嘅面頰同頸部有深灰色嘅陰影，睇起上嚟，呢隻馬好似迎着上方嘅光源、向天竭力嘶吼咁。

畫嘅左上角隱約見到畫家嘅署名。