M+，香港，M+新藝術委員會購藏基金購置，2021年 © 郭鴻蔚。圖片：M+，香港
旁述：
郭鴻蔚創作咗一系列名為《自然形式的圖集》嘅畫作。喺2024年開幕嘅「山鳴水應」展覽中，就展示咗其中三十六幅喺2017年創作嘅水彩畫。每幅作品尺寸相若，都係呈正方形，連埋畫框，邊長約40厘米。每幅畫作嘅背景都係白色，中間各自描繪一塊各有不同顏色嘅自然礦物同水晶。
呢三十六幅作品掛牆展示，以打橫六幅、打直六幅排列成一個大嘅正方形。離遠睇，就好似一個超過兩米高嘅巨型展示櫃，個櫃有三十六格，每一格都展示咗一塊礦物樣本咁。
畫中嘅礦物全部都大約有一張A4紙咁大，各有唔同形態，並以唔同嘅色調呈現礦物表面嘅質感同光凙，睇起嚟，每塊都似係唔同嘅礦物。其中，有一塊通體翠綠嘅玉石，表面好似脹起咗一個個泡泡；有一塊礦物係黃色、加上深橙色嘅雲狀紋路，好似一塊蜜蠟；有一塊灰綠色扁身嘅橢圓形石，石體邊沿鋒利，呈梯級狀，似係斧鑿嘅痕跡；亦有一塊圓圓哋嘅礦物，表面有唔同切面，切面邊緣呈粉紅帶紫色，中心透現一抹悠悠嘅藍光，好似通透嘅粉紅水晶，而水晶下方，連住粗糙嘅灰色石，似係呈現水晶未開採出嚟嘅原石狀態。