周綠雲 《激霰二》

旁述：

藝術家周綠雲會用一啲唔常見嘅工具去創造出咁迷人嘅畫象，呢個係呢幅作品最吸引人嘅地方之一。佢個仔楊見平分享咗對自己媽媽創作嘅回憶。

楊見平：

佢咩嘢都會用！佢有陣時邀請朋友返屋企，俾佢哋睇佢用嚟畫圓圈嘅餅乾盒蓋之類嘅嘢。佢會用風筒嚟噴漆，佢真係咩都會用：家庭用品、廚房用具之類嘅嘢，甚至係唔同類型嘅煮食用具，仲有刷，唔係用嚟畫畫嗰啲刷喎，而係一般用嚟清潔嘅刷。佢仲會用碎嘅羊皮嚟潑漆添。

噢，仲有佢用嘅墨水，係叫人去五金舖買嘅，有唔同類型嘅墨水同油漆。佢成日都想用一啲奇奇怪怪嘅嘢，將佢哋加埋一齊去創作。佢過身之後，我哋想清潔佢屋企嗰陣見到一個驚人嘅景象：就係屋企裏面有有好多古靈精怪嘅野，都係一啲古老又古怪嘅嘢。

旁述：

撇開風筒同羊皮唔講，周綠雲喺佢生命之中一段特別黑暗嘅時期創作咗呢幅畫，喺藝評人之間備受討論。我哋問楊見平對呢幅黑暗時期嘅作品有咩感受。

楊見平：

佢喺1977年創作呢幅畫，當時應該係我爸爸有病，甚至係垂死嘅時間。我幾鍾意呢幅畫，因為佢睇起嚟好靚。除此之外，呢幅畫畫嘅時候，係我媽媽人生中最黑暗嘅時期；畫裏面有好多黑色同灰色，但同時又有少少其他顏色。當我睇住佢呢啲充滿黑暗嘅作品，我為媽媽嘅憂鬱感到好難過。

但喺我睇住幅畫嗰陣，我第一個反應並唔係作為一個藝術評論家或者我鍾意唔鍾意呢個作品咗去睇，而係諗「其實，我媽媽可能冇咁憂鬱。」所以，我好開心睇到畫裏面有少少顏色。雖然她成日都係非常憂鬱㗎喇，但佢嘅情況並唔係咁嚴重。呢一點令我感受最深刻。

我覺得呢幅畫係相當強大嘅作品，不過，當你睇一個畫家，即係我媽媽，佢並唔係一個咁強勢嘅人。她雖然可以畫出咁勁嘅作品，但佢好多想法都非常細膩同敏感。佢試圖表現出強大有力同時又細膩、敏感嘅作品。她其實係想做出咁嘅作品，而唔只係畫一幅畫好睇得咁樣。

旁述：

呢件作品嘅名稱係《激霰二》，係周綠雲喺1977年創作嘅水墨設色紙本作品，高66厘米，長139厘米。

一股漩渦彷彿從紙本嘅中下方迸發出嚟，一條條黑色弧線從底部往上延展，分別喺左右兩邊上下往返，有如盪起一道道亂竄嘅黑色流水，亂流形成漩渦，包圍住一團呈淡紅色嘅球體。

漩渦中亂流起筆嘅位置墨色濃厚，往上提轉嘅筆劃漸幼且淡，筆墨大部分迴轉到紙上形成漩渦，部分就貼住紙邊，似係延伸到紙本以外。漩渦當中夾雜乾筆擦出嘅幼黑細線，而濃重嘅墨色底下透出一彎一彎紅色筆觸，當中又混和咗一抹抹淡黃色，睇起嚟漩渦有遠有近，顯得有深度，似係將滾動中嘅紅色球體包圍其中。

而呢團淡紅色球體係由一圈圈嘅筆觸填滿而成，表面有一點點通透嘅橙黃色，就好似球體滾動時，有柔和嘅光線散射出嚟咁。球體周圍另有潑灑而出嘅墨點，呢啲墨點濕潤化開，似係流向散射嘅橙黃色光線，睇起上嚟，黑色漩渦包圍球體嘅同時，亦都被球體吸收化解。

漩渦嘅右下方有一個方形朱紅鈐印，印有「綠雲繪畫」四字。