巴勃羅・畢加索 藝術家的父親何塞・魯伊斯・布拉斯科

伍曉銓：

呢幅畫係畢加索一幅好早期嘅作品。佢喺十三、十四歲嘅時候，畫咗呢幅佢爸爸何塞．魯伊斯．布拉斯科嘅肖像畫。

但係，呢幅畫有咩咁特別呢？年輕嘅畢加索明顯已經好有才華。但更有趣嘅係，呢幅畫反映咗畢加索同佢爸爸嘅關係。魯伊斯．布拉斯科係一位美術老師、策展人同畫家，佢最出名畫雀鳥，特別係鴿。而白鴿後來亦成為畢加索著名嘅創作題材。

魯伊斯．布拉斯科喺畢加索成為藝術家嘅過程裏面扮演咗重要嘅角色。呢位爸爸唔單止鼓勵佢個仔創作，仲協助佢考入自己任教嘅藝術學校。畢加索曾經講過：「每次我畫男人，不自覺就會諗起我爸爸。對我嚟講，男人就係『何塞先生』，呢樣嘢一世都唔會改變。佢留住鬍鬚，所有我畫嘅男人，多少都有佢嘅影子。」

望住呢幅肖像畫，你會唔會感受到畢加索對佢爸爸嘅感情，同埋佢爸爸對呢個天才阿仔嘅心意？

旁述：

呢件作品嘅名稱係《藝術家的父親何塞．魯伊思．布拉斯科》，係巴勃羅・畢加索喺1895年創作嘅油畫，高約52厘米，長約32厘米。

畢加索以深沉嘅啡黃色為主調，用細緻筆觸描繪自己父親右側嘅面容同半身。畫中嘅中年男士似乎有少少寒背，佢一臉嚴肅，凝望畫嘅右方。

男士從頭部到膊頭嘅位置，佔畫面約四分之三。佢鼻樑高、眼窩深，眉毛濃密，面頰微微凹陷，面部輪廓清晰分明。佢金啡色嘅短髮有少少攣，前額嘅頭髮向後梳，睇落整潔俐落。佢留住啡黃色短鬚，鬍鬚由上唇到下巴，再延伸到腮邊。上唇嘅鬚比較厚同蓬鬆，其餘嘅鬚就比較短同貼面。男士着住灰中帶啡綠色嘅厚身反領外套，內襯白色企領衫。佢嘅頸部線條粗壯，喉核位置露出白色企領衫嘅領口。

呢位男士嘅額角、眼尾、顴骨、後頸同肩背因為迎向光，睇落比較明亮，而前襟就因為背光所以顯得比較陰沉。作品嘅背景顏色偏灰帶泥黃色，同人物啡黃色嘅色調彼此融合。

畫嘅右上角有畫家嘅署名。