莫娜·哈透姆 《Kapan iki》

旁述：

假如你第一次見到呢個作品，請你花少少時間去睇下莫娜·哈透姆呢件作品。佢令你聯想到啲咩呢？

我哋問咗十歲嘅胡靖同佢嘅爸爸媽媽同樣嘅問題。

靖：

一隻透明雀仔跌喺咗地上變成血。於是見唔到雀仔。 點解血會變成咁？因為雀仔死咗，然後雀仔就變成血、喺血裏面。因為睇唔到雀仔嘅屍體，於是覺得呢個籠係一個鳥籠 ，係一個無門嘅籠。好似有時唔開心，有時悲傷，同埋好悶嘅感受。

媽：

我覺得佢歪菱歪稱好似高樓大廈，然後入面啲紅色，睇起嚟有啲不安，可能紅色有啲似血。佢好似想掙扎離開，喺窿窿罅罅果度跌咗出來。

爸：

我第一眼見到嗰陣，佢哋啲高度有啲似人嘅高度，對應而家社會狀況，好似每個人都有一啲距離。 好似有種一點五米距離嘅感覺。 聽完胡靖講，好似被佢啟發到，我都好似佢咁想像有隻雀仔喺裏面飛來飛去，不停地去撞，但有趣嘅係，我哋緊講嘅唔止一個籠一隻雀，而喺呢度有五隻雀仔被困住。

旁述：

我哋問胡靖如果佢係其中一隻困喺籠嘅雀仔，佢會有咩感受呢？

靖：

雀好似被困住好可憐。 因為嗰度無門可以打開。

旁述：

胡氏一家喺見到呢件作品之前並唔知道作品背後嘅意思，佢哋對呢件作品嘅外型、色彩同埋質感嘅觀察，正好反映個人感受能夠對藝術品產生唔同嘅意義。

哈透姆認為任何藝術品、包括佢本人嘅創作都包含唔同層次嘅意義。所以觀眾毋須借助解釋或敘事，都可以引起唔同嘅想像甚至情緒感受。 嗱，而家再望真啲 ，你見到啲咩呢？

旁述：

呢件作品嘅名稱係《Kapan iki》，係莫娜・哈透姆喺2012年創作嘅雕塑，物料包括軟鋼同手工吹製玻璃，作品尺寸視乎展示方式同空間而定。

五個打直嘅黑色長方體鋼籠分散放置喺展區平地上，每個籠都微微傾側，傾側嘅程度同方向各有唔同，籠嘅高度亦唔一致，大概係成年人腰間至肩膊嘅高度不等，睇起嚟似一棟棟傾斜嘅建築物。呢啲籠係以黑色軟鋼筋屈曲而成，鋼筋表面有斜紋，轉折位置屈成圓角。每條鋼筋平均分隔，整齊地橫橫直直咁排列，形成一個個方框，可以睇到內籠。

每個籠裏面嘅底部各有一件或兩件紅色透明玻璃物體，大約係成年人雙手合埋可以捧住嘅大細，透過玻璃可以見到籠底被映照成紅色嘅鋼筋。玻璃物體各有唔同形態，呈不規則形狀，好似有生命嘅有機體。除咗一件玻璃之外，其他玻璃頂部都凸起，好似火山口咁有個圓形嘅窿，係吹製玻璃時黐住吹管嘅痕跡。玻璃嘅外形飽滿，接觸到鋼筋嘅位置向內凹入，喺方框嘅位置就向外凸出，有啲幾乎將鋼筋包住，就好似一泡杰撻撻嘅液體湧緊出籠外面嘅時候凝固起嚟，而主體仍然困喺籠中。其中有一件玻璃物體形狀扁平，似係啱啱逃離出去，但被籠底嘅一邊壓住。