巴勃羅・畢加索、倉俁史朗 畢加索與倉俁的魔法

伍曉銓：

你有冇幻想過，房入面嘅物件會有生命，就好似《愛麗絲夢遊仙境》咁？又或者好似《納尼亞傳奇》，有道奇怪嘅門，通向奇幻嘅世界？呢種將魔法帶入日常生活場景同物件嘅概念，啟發到好多藝術家同設計師。

喺呢幅畫入面，畢加索將普通嘅客廳變成咗奇異嘅場景。右邊嘅身影，究竟係一座放咗喺底座上面嘅半身像，定係一個企緊喺度嘅人呢？唔對稱嘅衣櫃同埋佢精巧嘅設計，令佢似乎擁有生命。

喺呢一間房，亦都有一組由倉俁史朗設計、充滿想像力嘅家具。你會見到，好似《朱古力獎門人》裏面嗰張兩邊都有床頭板、好長嘅床組 ，仲有好似喺度鞠躬嘅高身花樽，同埋會令人望多兩眼，去確定究竟係固定定係懸浮緊嘅半透明茶几。

旁述：

呢件作品嘅名稱係《沃夫納格的餐具櫃》，係巴勃羅．畢加索喺1959至1960年間創作嘅油畫，高195厘米，長280厘米，約一道門咁高，三道門並排咁闊。

作品描繪一個光線明亮嘅房間，中間有一座黑色櫃，前方有一隻斑點狗，左右兩邊各有一個人形，而後方淺藍色嘅牆上有天藍色嘅長方形，似掛畫又似窗口。成個畫面色彩鮮明，有明顯嘅塗抹痕迹。除咗黑色櫃嘅外形同表面有較複雜嘅線條外，其他物件都描繪得有啲模糊同簡略，只能夠從描畫嘅輪廓中聯想到佢哋嘅形態。

個黑色櫃頂天立地，闊度佔咗畫面大約一半空間，櫃頂似有飛簷，櫃身左右唔對稱：左邊上方有一條螺旋狀嘅柱，似係個櫃嘅支撐部件；右邊就似有一個個唔同大細嘅間格。成個櫃都有灰白色同翠綠色嘅線條，似勾勒櫃身同櫃門嘅花紋，或者係放喺櫃中嘅餐具。

櫃嘅前方，有隻朝向右邊嘅斑點狗，睇唔到個頭，佢個身、四肢同尾巴都以白色線條勾勒，同佢身後嘅黑色櫃嘅顏色對比強烈，睇起嚟特別明亮。

黑色櫃嘅左方，有一個人形面向黑色櫃，身高只到櫃嘅一半，身體呈三角形，似着住綠色裙。佢圓碌碌嘅頭係灰色一片，無五官，有密集嘅筆觸描畫頭髮，髮型似冬菇形狀。呢個人雙腳微曲，向住櫃伸出一條彎彎嘅手臂，似係喺最左邊嘅一張凳企起身離開嘅一刻。

而黑色櫃嘅右方，有另一個人形，形態似一尊放喺高身啡色基座嘅半胸像，又似一個企喺度面向住黑色櫃嘅人。人形身高接近櫃頂，有黑色及肩長髮，面容不清，只有一片唔均勻嘅暗藍色。