巴勃羅・畢加索 台座上的大靜物

馮樂山：

《台座上的大靜物》唔係一幅典型嘅靜物畫。沿住粉色牆壁、彎彎曲曲嘅線條，令室內空間扭曲，呈現出超現實嘅氛圍。圓潤粗厚嘅黑色輪廓增添動感，而鮮豔嘅色彩就畀我哋一種卡通化嘅感覺。

好明顯，畢加索唔打算畫一幅平常古板嘅靜物畫。相反，佢嘗試喺呢種熟悉嘅繪畫類型上，加入一絲怪誕魔幻。紅色同紫色嘅枱下面有一對跳舞嘅腳，仲有其他俏皮嘅元素，例如黃色嘅花樽有迷人嘅曲線。而綠色同紫色嘅水果就好似眼睛或者乳房。

畫入面仲有好多有趣嘅細節。呢啲形狀仲會令你有啲咩其他嘅聯想？有邊啲部分望上去會覺得奇怪或者令人費解？畢加索將普通嘅家居場景變成充滿樂趣嘅視覺謎題，畀我哋無限嘅詮釋空間。

旁述：

呢件作品嘅名稱係《台座上的大靜物》，係巴勃羅．畢加索喺1931年創作嘅油畫，畫作以直度方式繪畫，高195厘米，長約131厘米，大約有一道門咁大。

作品以黑色粗線勾勒出好多個圓潤嘅形狀，描繪一張放喺牆角嘅台座，枱面好似有一點燭光，同埋放咗類似花樽、花同枱燈嘅物件。物件色彩鮮艷，線條流暢。仔細咁睇，物件之間有兩對並排嘅圓形，似係兩雙眼睛。連同其他形狀一齊睇，就好似有兩個人隱藏喺台座上嘅物件之中。整個畫面微微左右扭曲，顯得物件同場景好有動感。

喺畫面中央，好似有一張半圓形嘅台座靠住牆角擺放。台座嘅面同靠牆嘅下方，都有紫藍色同黑色相間嘅色塊，似係枱布嘅花紋。枱布一半鋪喺枱面，另一半垂落地，而垂落地嗰一邊枱布，仲有一截紅色粗間條。

台座上面有唔同形狀嘅色塊，似係擺放咗唔同嘅物件。最左邊似乎有一簇火焰，由內到外分三層顏色，最入面嗰層係綠色，中層係紅色，外層係粉紫色。火焰旁邊好似有一個帶把手嘅黃色長頸花樽，佢有半幅畫咁高，幼長嘅樽頸下係飽滿嘅壺身，底部向內收窄；壺身右邊有纖幼嘅手把，好似藤蔓咁捲曲。而花樽右邊，好似有一朵巨型嘅紅花，尺寸同花樽差唔多大，可以見到兩個帶小黑點嘅綠色圓形果實，果實後面有一塊紅色花瓣，而枱邊就垂掛住另外一塊花瓣同兩個淡紫色圓形果實。花嘅右邊，好似有一盞白色枱燈，燈桿幼長，燈罩同底座寬闊。燈罩上有三個紫色圓形，其中兩個中間有黑點。燈光向下照射，透出黃光。

台座嘅底部有三個長條形色塊，似係三隻枱腳，一隻橙啡色、一隻白色、一隻翠綠色。如果將枱面同枱邊嘅果實連埋一齊睇，就好似有一個人挨喺枱邊，綠色果實係佢嘅眼睛，粉紫色果實係乳房，而白色枱腳就係呈英文大楷「S」字嘅身軀。如果將橙啡色枱腳、翠綠色枱腳同枱燈上嘅紫色圓形連埋一齊睇，就好似見到另一個人，紫色圓形係佢嘅眼睛，橙啡色同翠綠色枱腳係佢對腳，擘開呈一字馬，企喺挨住枱邊嘅人嘅後面。

台座嘅後方係一幅牆，牆面有黑色腰線同地腳線。牆嘅顏色劃分為左右兩邊：左邊係粉紫色，右邊係粉綠色。牆嘅下方係地板，有格仔紋嘅地磚，睇落就好似台座放喺牆角咁。