巴勃羅・畢加索 朝鮮大屠殺

伍曉銓：

一班面無表情嘅士兵用槍指住四個女人同四個小朋友。被指住嘅人神情驚恐，赤裸無助咁企喺荒涼嘅土地上，更顯出佢哋嘅恐懼同埋脆弱。

呢幅《朝鮮大屠殺》係對1950至1953年韓戰嘅回應。韓戰係冷戰期間一場關鍵嘅衝突。美國支持南韓，而蘇聯同奉行共產主義嘅中國就支持北韓。早喺1944年，畢加索因為祖國西班牙嘅法西斯勢力崛起，就加入咗法國共產黨。而呢幅畫就係佢對地球另一邊戰爭暴力嘅抗議。

畢加索嘅作品好少以時事為題。為咗處理呢個主題，佢借鑑咗幾幅歐洲經典名作，包括哥雅嘅《1808年5月3日的槍決》同馬奈嘅《槍決皇帝馬克西米連》。兩幅畫都有壓迫者同受害者，構圖相似。呢幅畫亦係畢加索少數直接指向亞洲嘅傳世作品之一。事實上，畢加索從未去過歐洲以外嘅地方。為咗創作呢幅畫，佢好可能參考咗當時報紙上相關戰爭報道嘅相片。

喺嗰段時間，報紙開始用彩色印刷。畢加索好想傳達佢嘅反戰信息，所以畫中人物係黑白色，而背景係彩色。佢希望呢件作品可以係一幅畫，又可以當成印刷品。至今，呢幅畫仍然係對戰禍塗炭生靈嘅深切見證。

旁述：

呢件作品嘅名稱係《朝鮮大屠殺》，係巴勃羅．畢加索喺1951年創作嘅油畫，高110厘米，長約210厘米，約係一道橫放嘅門咁大。

作品描繪喺一片黃綠色交織嘅野外，左右各有一組灰色色調嘅裸體人物。左邊一組係四個女人、三個小孩同一個嬰兒，佢哋面容扭曲，睇落好似好哀傷或者驚恐。而右邊一組係六、七個士兵，佢哋戴住頭盔，以長槍或者利劍指向左邊嗰一群女人同孩童。所有人物嘅高度都差不多同畫面一樣高。人物背後，係遠山同平原。

畫面左邊，四個全裸嘅女人挨埋一齊，膊頭貼膊頭，當中有兩位大住個肚，似係孕婦。最左邊嘅一位個肚好大，佢一隻手抓額頭，揦埋口面，抬頭望天，另一隻手護住一個趌高腳、伏喺自己身旁嘅小孩。呢個女人隔籬有另一位婦人，佢雙手環抱住嬰兒，側住頭，面貼住嬰兒，佢面容扭曲，似乎帶有淚痕。佢右邊有另一個大肚婦人，佢眯埋雙眼，垂低攤開嘅雙手、掌心向外，其中一隻手拖住隔籬嘅少女。少女比其他人矮半個頭，佢圓圓嘅面上木無表情，用一隻手遮住裸露嘅胸口。少女嘅右邊有一個小孩，向住少女張開雙臂，頭擰向後方望，似想逃走跑向少女咁。呢個小孩嘅腳邊有另一個小孩，佢踎喺地，似係玩緊地下嘅碎石。

畫面右邊，有六、七個裸體士兵戴住唔同款式嘅頭盔同面罩，佢哋嘅肢體動作硬朗，睇起嚟就好似毫無感情嘅機械人咁。呢啲士兵舉起長槍或者利劍，指向左邊嘅一群婦女同小孩。喺最前嘅士兵擘大雙腳，似邁開闊步前進。士兵嘅身體顯出厚實嘅肌肉線條，同左邊婦女纖柔嘅身姿形成強烈對比。

喺女人同小孩嘅後方遠處，係一片碧綠色夾雜枯黃色嘅山嶺，山上似有破敗嘅建築物。而畫嘅中央，山腳嘅平地上有幾抹深啡色同土黃色，似係荒地上嘅廢城，又或者正在燃燒嘅土地。