「山鳴水應」展覽現場，2024年。攝影：鄭樂天。圖片由M+提供
旁述：
呢件作品嘅名稱係《白描芥子園（十一日談系列）》，係楊詰蒼喺2009至2014年創作嘅水墨作品，物料為水墨礦彩絹本，高約2米8，長11米6，厚5厘米。作品掛喺牆上展示，大約係一層樓咁高，一架雙層巴士車身咁長。
作品係由八幅直度畫板組合成一個連貫嘅畫面。畫面用上黑色墨水，以線條細膩描繪一片山林。林中有樹、雲團、山石同動物，動物包括熊、馬騮、河馬、老虎、糜鹿、鵝、狼、鶴、老鼠、人類等。大部分動物都配成一對對，各有唔同嘅動靜同姿態。
樹林集中喺畫面中央位置，茂密嘅大樹盤根錯節，枝葉繁盛。一縷連綿嘅白雲縈繞喺密林之間。畫面左邊，有一條蜿蜒向左下方嘅河流，河嘅兩岸長有雜草。而畫面嘅右邊似係一片草地或者泥地，睇起嚟比左邊同中間嘅畫面空曠，右上方係呢片土地嘅盡頭，似係崖邊。
有過百隻動物以三三兩兩或者單獨嘅身影分散喺山林之中，佢哋好似好悠閒咁四處遊走、喺草地瞓低、喺密林之間雜交，或者聚集喺河岸。例如喺畫面左邊，有一群鵝同河馬靠岸暢游，又有一隻馬騮騎喺虎背上渡河；而喺畫面近中央位置嘅密林，有人類同動物藏身其中。例如，有一個留長髮嘅人俯身向前，同時有一隻山羊撲喺佢嘅背脊上面交配；而喺密林嘅外圍，有一隻狼低頭啜飲河馬嘅奶。