王晉 《我的骨頭》

皮力：

我係皮力，我係「M+希克藏品：別傳」嘅策展團隊成員之一。

我第一次睇到王晉嘅作品《我的骨頭》嘅時候，都係好震撼，因為每一塊骨頭差唔多有兩米幾高，完全超過咗一個人嘅身高，而佢呢種白瓷嘅質感亦都唔係好光滑嗰種，特別係有種好粗糙嘅感覺，所以你睇起上嚟會覺得佢好似一個好奇怪嘅化石。

旁述：

呢啲巨大嘅白瓷骨頭，全部都由王晉一個人獨力完成。皮力同我哋傾到王晉喺創作入面嘅勞動，同埋骨頭嘅意義。

皮力：

就係以一個咁大嘅規模去做兩米幾嘅陶坯，然後上釉，再拎去燒。我覺得咁樣就係返到去一個藝術家最根本嘅嘢，佢係一個會整污糟對手嘅基本勞作。

佢覺得呢啲就係佢嘅骨頭，佢身體嘅一個存在。呢一啲骨頭代表死亡嘅意象，佢實際上同2000年左右中國內地社會呢種欣欣向榮，啱啱申請咗奧運會，又啱啱申請咗世界博覽會，一個新嘅千年已經嚟到嘅嗰種欣欣向榮嘅關係，兩者之間形成咗一個巨大嘅反差。

我諗當代藝術唔見得永遠表達呢個時代美好嘅一面，好多時候，當代藝術畀我哋見到呢個時代身處嘅呢一種美好、繁榮之下嘅呢啲危機，或者係需要我哋思考嘅地方，我諗咁樣先係藝術畀我哋嘅一個最基本作用。

旁述：

呢件作品嘅名稱係《我的骨頭》，係王晉喺2000年創作嘅裝置作品，用嘅物料係釉面瓷。作品為一組五件嘅巨型白色骨頭，每條骨頭高約兩米，約莫比一道門高。喺2023年開幕嘅「M+希克藏品：別傳」展覽中，作品就喺其中一個展區嘅角落位置展示。

骨頭呈柱狀，粗度大約有成人雙臂環抱咁粗，顏色白中帶灰，部分位置透出底層嘅啡色，呢啲位置睇落特別粗糙。而骨頭兩端，有一舊舊向外凸起嘅地方。仰望骨頭，上端有罅隙同斷裂嘅痕跡，而下端就明顯比上端粗壯。骨頭中段係呈柱狀嘅骨幹，微微向一側彎曲。

所有骨頭嘅表面都唔平滑，帶粗糙嘅細紋。每條骨嘅外形各有差異，唔能夠明確辨別係邊類物種嘅骨頭，或者嚟自身體邊個部分。