洪浩 《我的東西第5號：2002年的5000件垃圾》

旁述：

呢度有數以千計唔起眼嘅物件擺埋一齊，就好似一個小宇宙咁。

藝術家洪浩用咗12年，每日堅持儲起個人生活入面嘅消費品，佢專登揀一啲零碎或者完全唔起眼嘅嘢，好似係樽蓋、飲品罐等等，令物件嘅底部同掃描器「零距離接觸」，然後產生出一張張平鋪直敘嘅圖像，物件嘅細節喺掃描圖像入面一覽無遺，呢個方法比攝影更加客觀。洪浩根據物件底部圖像嘅顏色同埋形狀，整齊有序咁排列組成一幅大型嘅流水帳本。

呢件作品唔單止呈現洪浩當時嘅消費物質同生活狀態，更加描繪咗消費主義所帶嚟嘅巨大影響。隨住社會嘅發展，新產品持續湧現，舊有嘅物件面臨淘汰或者取代。全球化同時令到生活喺唔同環境嘅人，可以接觸到類似甚至一樣嘅消費品，但就令人對物質有同等嘅依賴，而當呢一代人嘅依賴得唔到滿足，更會帶嚟精神上嘅痛苦。

當你再望住相入面嘅物件嗰陣，你會點樣形容你同你擁有嘅物件之間嘅關係呢？

旁述：

呢件作品嘅名稱係《我的東西第5號：2002年的5000件垃圾》，係洪浩喺2001至2002年間創作嘅攝影作品，作品為彩色照片，圖像高120厘米，長約210厘米，作品裝裱完成後，圖像四周有約3厘米嘅白邊。圖像整體就好似以俯視角度拍攝5,000多件喺日常生活用過嘅物品咁。

呢啲大大細細嘅日常物品密麻麻鋪滿成個畫面。物品五顏六色，而背景係黑色，色彩對比強烈。有啲物品帶有文字、具獨特嘅形狀或者亮眼嘅顏色，較易辨認出係咩物品；有啲就辨認唔到。物品嘅形狀大致有圓形、長條形、四邊形、三角形同埋不規則形狀。

圓形物品集中喺中央位置，較大嘅圓形喺中央靠右，較細嘅圓形就由中央靠下方延伸到中央靠左，物品包括：銀色嘅汽水罐、水渠隔、連皮嘅原個蒜頭、檸檬切片、面值一毫子嘅香港硬幣、面值一元嘅人民幣硬幣、唔同顏色嘅鈕扣等。

長條形嘅物品橫向排列，橫跨圖像下方左右兩邊，特別集中喺左下角。呢啲長條形物品有長有短，包括紙盒裝藥物、支裝軟膏、塑膠打火機、攣咗嘅煙頭、漿糊筆、銀色嘅金屬門鉸、指甲鉗、白色膠叉、綠色嘅飛鏢等用品，當中夾雜小骨頭、魚骨同螺絲粉等食物。

四邊形嘅物品則較集中喺右上角，有小盒裝牛油、藥油紙盒、菲林包裝盒、菲林、排裝藥丸等。

三角形同不規則形狀大多同其他形狀嘅物品撈埋一齊，鋪滿圖像其餘位置，有文件夾、刀片、帶有文字嘅紙片、撕碎嘅人像相、粟米粒、原粒蓮子、蝦乾、蒜頭衣、汽水蓋掩等等。