周綠雲 無標題

馮樂山：

睇吓右邊嗰啲層次分明嘅圖案，深色嘅部分喺每層之間創造出陰影同深度。當你睇耐啲，就會發現呢一部分好似皮膚一樣。望吓你手背，想像手指關節附近有皺褶嘅皮膚質感。慢慢望向畫嘅中心，皺褶變得愈嚟愈密，好似腸道內壁嘅紋理。再移落啲，會見到一個開口，似乎畀纖細嘅網狀人體組織或者肌腱包住。

呢幅畫彷彿喺我哋眼前變形幻化，自然咁由外景過渡到內省嘅意象。藝術家周綠雲嘅作品帶我哋喺一片有機嘅奇觀景象中遊走，踏上反思冥想之旅。

就好似畢加索嘅藝術提供咗新視角去觀察人體，呢幅畫結合水墨傳統同埋現代概念同技巧，例如抽象畫法，徹底革新咗我哋對水墨畫的認知。

旁述：

呢幅無標題嘅畫，係周綠雲喺 1970年代創作嘅水墨作品，邊長91厘米，呈正方形。

藝術家以濃淡有致嘅筆墨，描繪出層層漸變、唔同深淺嘅灰色同黑色，離遠睇，似一片山水交融、層層交疊、既遠且近嘅暗沉景象。

喺畫面嘅左方，中央到下方位置，有一筆筆細緻嘅筆觸同埋濃淡不一嘅墨色，呈現一層疊一層嘅陰影，似係一座山巒重疊嘅大山，又有如一把柔滑嘅長髮，由中央流瀉而下，再向右方流淌。而喺右方嘅層層陰影之間，描繪咗一叢叢枝條，似植物嘅根部，又似網狀嘅血管或者人體組織。呢啲枝條或者網嘅頂部，連住一條條細密嘅幼線，似係密集嘅肌腱紋理。肌腱紋理向上接住一圈套一圈、輪廓分明嘅線條，似人體關節部分嘅皮膚皺褶，又有如鳥瞰一層疊一層嘅岩石堆。喺畫嘅上方，岩石堆之間有一尖端，伸向遠方亮白之處，有如平靜嘅水面映照出嘅月光嘅倒影，倒影喺暗沉嘅岩石之下顯得份外明亮；離遠睇，倒影似蔓延到左方大山後背，若隱若現。而倒影上方，有一列層層重疊、有凸有凹嘅線條，似唔平整嘅岸邊。近岸嘅水面有一抹抹較灰暗嘅墨色，似透現水底岩石嘅暗影。

畫嘅左邊，隱約見到藝術家嘅署名同鈐印。