孫原及彭禹 《老人院》

旁述：

你有冇諗過當一件藝術品仲未完成，佢嘅構思已經俾人收藏咗呢？烏利．希克博士喺2000年代遇到藝術家彭禹和孫原嘅時候，就發生咗呢個情況。

烏利．希克：

事實上，我哋已經好熟，佢哋會同我分享就嚟完成嘅作品，我都成日同佢哋講我計劃緊嘅展覽，我哋會睇吓雙方嘅概念點樣夾到。呢個就係成件事嘅由來，然後佢哋向我提出咗呢個諗法。

旁述：

呢個就係《老人院》點樣由幾幅畫變成蠟像，然後先喺瑞士展出，而家嚟到M+展出嘅過程。睇吓呢啲蠟像嘅面孔，你會發現佢哋好似軍事、政治同宗教領袖，甚至係哲學家。

烏利．希克：

個構思係要令佢哋睇起上嚟唔係十足十似某啲在世或已經離世嘅人，而只係相似，或者令我哋聯想到某啲人物。而雖然佢哋唔係嗰啲人物，但係令我哋諗起呢啲人，同埋嗰啲曾經非常有影響力但係而家或者好過時嘅諗法。呢一啲帶住舊思想嘅老人仍然統治住呢個世界。佢哋就好似俾人帶咗入某種老人庇護所，早就失去同現實世界嘅連繫。

藝術家仲話我知，呢個都係一種遊戲，佢哋玩緊呢一班老人家，就好似呢班老人家喺度玩緊我哋同埋呢個世界咁。

旁述：

呢個二十幾年前構思嘅作品，經受時間考驗，依家仍然反映住我地身處嘅世界。

旁述：

呢件作品嘅名稱係《老人院》，係孫原同彭禹喺2007年創作嘅裝置作品，展示13個坐喺電動輪椅上嘅人物塑像。塑像以玻璃纖維同矽膠製成，每個都身穿唔同衣物，佩戴唔同配飾。喺2023年開幕嘅「M+希克藏品：別傳」展覽中，作品就喺一個長10米，闊13米嘅展區展示。

呢啲模仿真人嘅塑像，全部都係老人模樣。每個塑像尺寸同真人嘅比例相若，外觀同衣着望落似係嚟自世界唔同地方嘅男性領袖人物。佢哋大多數眼神渙散，似軟弱無力咁癱坐喺電動輪椅上，以極度緩慢嘅車速喺展區內移動。

呢啲老人塑像滿頭白髮或者禿頭，鬍鬚發白，面皮鬆弛有啡斑，滿面深刻嘅皺紋，眼皮半垂，眼睛混濁。

呢班人着住唔同嘅深色裝束，包括西裝、民族服裝、中山裝；另外，有人戴頭巾，着中東地區嘅長袍服飾；有人着軍服，前襟扣咗幾個勳章；亦有人着宗教禮服，帶住一條十字架吊飾頸鍊。部分老人嘅服飾尺碼偏大，當中有部分人嘅領口同領呔鬆開，顯得老人瘦小而且呈現疲態。佢哋嘅樣貌似乎係一啲老咗嘅政治、軍事或者精神領袖，但唔能夠清楚辨認到特定人物。

每個老人嘅坐姿都唔同，例如有人垂低頭，上半身側向一邊，似瞌緊眼瞓；有人撐住拐杖低頭沉思；另外，有人寒住背坐，就好似成個人陷入輪椅之中；有人就擘開腳，頭向後仰，合埋眼，好似瞓到好冧咁。當中又有部分老人拎住唔同物件，例如有人手執軟鞭，另一隻手撳住輪椅扶手，挺腰，眼望前方；有人抱住一個外形好似金屬煲嘅地雷，有人拎住隻白手襪，亦有人𢭃住罐啤酒或者將份報紙放喺大髀上。

方形展區被矮牆圍起，全部老人塑像坐嘅電動輪椅，以極之緩慢嘅速度自己移動，睇起嚟所有人好似慢慢喺圍牆內獨自遊蕩。當某個老人塑像就快撞到牆身或者其他塑像嘅話，輪椅會自動轉換方向，繼續緩緩前進，喺場內不斷兜兜轉轉。