謝德慶 《一年表演1978–1979》

旁述：

想像一下，喺一個比你身處嘅畫廊空間大唔得幾多嘅籠入面，你要獨自度過一整年，完全孤獨一人，除咗你嘅思想之外，乜嘢都冇。

謝德慶：

哈囉! 我叫謝德慶，我喺1950年出世。1974年7月13號，跳船到美國，我係一個非法移民。

旁述：

謝德慶係一位行為藝術家，佢出生於臺灣，二十四歲嗰陣喺紐約開始新生活。佢將自己喺呢片新天新地上嘅孤獨同迷茫，轉化為長達一年、別具開創性嘅表演。呢個籠就係佢第一件作品。

謝德慶：

所以呢一件一年行為作品──又叫《籠子》，我喺籠裏面一年，唔可以同人講嘢，都唔可睇書寫字，聽收音機，或者睇電視。

我嘅作品本身唔係一個關於監獄囚犯嘅政治隱喻，而係講緊一個人、一個孤立精神狀況。至於關於一年時間：就係地球繞太陽一周嘅時間，亦都係人類計算生命嘅一個基本單位，用嚟講述一個周而復始嘅生命。

旁述：

謝德慶為M+展覽揀咗一啲特定嘅記錄，説明呢個作品為佢帶嚟嘅精神壓力。嗰度有一個日曆，標明有十九日公眾可以參觀呢個無聲作品。喺啲相入面，你可以睇到佢啲頭髮喺一年內長咗幾多，仲有有律師簽署嘅文件，證明佢嘅行為並無取巧。其他相就顯示咗佢喺個籠入面其他嘅應對。

謝德慶：

仲有一張就係我喺籠入面嘅一角呆坐，就係床角個邊。嗰度好似我屋企，而其他三個角落就係外面。所以咁樣可以令我喺屋企，然後出去外面散步再返嚟來，令我覺得住喺入面闊落啲。

另一張就係我每日都要喺牆上面刻一橫。咁樣我就會知道過咗幾多時間，仲有幾耐要繼續。所以，我呢個作品本身就要講，生命就係生命嘅徒刑，生命就係度過時間，生命就係自由思考。

旁述：

呢件作品嘅名稱係《一年表演1978–1979》，係謝德慶喺1978至1979年間進行為期一年嘅行為展演。當中有唔同嘅物件同檔案記錄呢次展演。喺2021年開幕嘅「個體・源流・表現」展覽中，就展示咗同呢次展演相關嘅紙本文件、黑白照片同埋海報。

紙本文件有兩份，都係白紙黑字嘅英文打字文件。一份係有謝德慶簽名嘅藝術家自述，聲明佢自己會由1978年9月30日開始，單獨囚禁喺紐約一個牢籠裏面，牢籠尺寸為11呎6吋乘9呎乘8呎，為期一年，期間唔同外界溝通、唔閱讀、唔書寫、唔聽收音機、唔睇電視；禁閉期內有專人負責膳食、洗換衣物同處理大小二便。而另一份係由見證人Robert Projansky簽署嘅文件，聲明喺1978年9月30日見證謝德慶進入木製牢籠後，喺牢籠入口每個接駁位貼上紙製封條，並會喺1979年9月29日見證謝德慶離開牢籠。

黑白照片有四張，其中兩張係謝德慶嘅半身相，睇落好似係證件相，但係放大到差唔多成人手掌咁大。其餘兩張相分別影住謝德慶住喺牢籠嘅情況，同埋牢籠牆上嘅刻痕。

半身相中嘅謝德慶，係一位亞裔中年男子。其中一張相佢無留鬚，髮型係剷到好短嘅陸軍裝，上衣左襟印有「SAM 93078」，右襟印有「HSIEH 92979」。另一張半身相中，謝德慶着住同款嘅上衣，深色頭髮長到落膊頭，嘴角留有兩執鬚。

其餘兩張照片，其中一張係喺牢籠外影住牢內嘅謝德慶，牢籠由木條砌成，係由地下延伸到天花板嘅木欄，木條整齊地橫橫直直咁排列，形成一個個長方形框，每個框約為一卷廁紙闊、四卷廁紙高。牢內嘅謝德慶，身穿白色棉質衣服，坐喺床頭，繑住腳，用枕頭墊住背同頸，挨坐喺牢籠嘅一個牆角，頭靠後昂起，旁邊牆上有一盞着住嘅燈，整個環境光線幽暗。另一張相近鏡影住牆身嘅53組刻痕，以橫排6列、直排9行嘅方式排列，刻痕下方刻有「SAM HSIEH 93078–92979」。刻痕係一組組淺坑，每組由一排七條短直紋同一條橫劃組成，橫劃貫穿七條直紋嘅中間，似喺以8劃為一組記錄日子。53組刻痕中最後一行嘅最後一組，只有一條短直紋。

單色海報有兩張，底色一黑一白，兩張海報嘅排版設計相類似，上半部分都有牢籠嘅實境圖像，下半部分印有1978年9月至1979年9月嘅年曆，圈住咗開放畀公眾參觀嘅日子，參觀時間由當日早上11點至下午5點，海報嘅最下方註明地點，同埋開幕、閉幕嘅日期、時間。