小野洋子 《讓釘子錘進的畫作》

旁述：

呢件係日本藝術家小野洋子嘅作品，背後有好多故事，包括佢對繪畫嘅徹底反思，以及佢同約翰・連儂嘅邂逅。

小野洋子喺1950、60年代開始創作，佢係戰後其中一個會反思繪畫呢個媒介嘅藝術家。佢無向觀眾展示一件完成嘅作品，反而會提供想法、物料同指令，俾觀眾參與完成作品。

喺我哋面前嘅作品叫 《讓釘子錘進的畫作》，係小野洋子稱之為「指令繪畫」嘅早期創作，喺1960年代多次展出。佢將一塊白色木板釘喺畫廊牆上面，用鏈將錘仔吊住，旁邊張凳上面放一罐釘。呢堆原材料隔離附有文字，指示參觀者點樣參與呈現呢個作品

女聲朗讀（小野洋子）：

「每天早上將釘子錘進一面鏡子、一塊畫布、一塊玻璃、木或金屬⋯⋯這幅畫最後表面都佈滿釘子。」

旁述：

M+收藏嘅版本嚟自1980年代，當時小野洋子正重新審視佢早期嘅作品。佢用銅鑄，將隨意、臨時性嘅原作，轉化為沉重而永久嘅物件。重點係，過程中嘅每一個環節：由最初嘅手寫指令，現場參與式嘅表演、到最後將作品鑄銅，都係作品嘅基本元素。

喺呢啲原創作品之中，其中一件日後對藝術家有重大影響。1966年，喺倫敦畫廊一個預展，有一位男士問小野洋子：佢可唔可將一口釘鑿喺畫上面。小野洋子想令作品喺開幕前保持完整所以拒絕咗，但最後心軟同意。佢要求五個先令作為代價。但個男人身上無現金，佢話：「既然係咁，我俾一個想像嘅五先令你，然後鑿一口想像嘅釘上去啦。」小野洋子好驚喜，之後佢表示 ：「我遇到一個同我一樣識得玩呢個遊戲嘅男人。」

呢個男人就係約翰・連儂，世界知名嘅唱作人，三年後佢哋仲結為夫婦。

旁述：

呢件作品嘅名稱係《讓釘子錘進的畫作》，由小野洋子創作，最初係一段文字，源自小野洋子1961年嘅《繪畫指令》系列，之後佢喺1966年將系列中嘅一段文字化為參與式裝置，再喺1988年參照嗰件裝置鑄成呢個青銅版本。青銅板高29.5厘米，長22.8厘米，厚9.5厘米。

作品係一件雕塑，喺一塊水泥灰色嘅青銅板上，釘有好多口釘同好多個釘孔。銅板連住一條金屬鍊，條鍊嘅另一邊連住一把錘仔，錘仔放置方式視乎策展設計而定，佢可以斜放喺銅板上釘與釘之間，或者銅板隔離嘅牆身會有個掛鉤，錘仔就可以垂直晾喺個鉤上面展示。

銅板上，有60至70口深啡色嘅釘，同30至40個釘孔，佢哋不規則咁分布喺板上。啲釘釘入銅板嘅深度不一，露出板面嘅部分有高有低；釘入嘅角度亦唔一致，大部分都打斜釘入，釘頭或者會彎曲。銅板下方中央裝有金屬鍊，條鍊另一邊連住一把銅製錘仔手柄嘅末端。錘仔呈深沉嘅黃銅色，錘頭其中一邊方方正正，另一邊扁身呈錐形。錘仔手柄上打橫刻有作品名Painting to Hammer a Nail In。