收聽
圖片：M+，香港
馮樂山：
當我哋介紹歷代藝術家嘅生平，成日會提到男性藝術家同佢哋嘅女性繆斯之間嘅關係。呢點對畢加索嚟講特別貼切，因為佢同女性嘅關係對佢嘅藝術有好大影響。但當然，故事唔止咁簡單。例如，嗰啲帶畀畢加索靈感嘅女性，往往畀佢嘅名聲掩蓋，經常要忍受佢躁狂嘅脾氣同暴力嘅對待。
攝影師廖逸君透過將角色反轉，質疑藝術界入面呢種傳統性別觀念。喺我哋面前嘅相片，見到嘅女人係藝術家自己，而男人係佢嘅伴侶兼合作夥伴Moro。嚟自日本嘅Moro細佢五年。廖逸君喺中國長大，細個嗰時覺得將來嘅伴侶要比自己大，應該要係一個可以指導自己嘅人。但係，佢同Moro嘅關係完全改變咗佢嘅睇法。佢開始重新思考性別定型，透過攝影探索當中多變嘅關係。身為創作者，廖逸君主導作品嘅構圖，負責擺好模特兒Moro嘅姿勢。喺相片中會見到，佢有時會叫Moro着女裝裙，有時就要佢擺出服從嘅姿態。廖逸君嘅影像作品用親密又俏皮嘅方式，顛覆傳統嘅男女權力關係。
旁述：
廖逸君有六幅攝影作品喺2025年開幕嘅「畢加索──與亞洲對話」展覽中展出。呢批作品都係佢喺2010至2018年間創作，有直度有橫度，尺寸不一，最大嗰幅高127厘米，長約95厘米，最細嗰幅就高約38厘米，長50厘米。
呢啲作品全部係彩色嘅雙人或者單人照片，當中出現嘅一男一女人物，係廖逸君本人同一位成年男子，佢哋都係中等身材。廖逸君留有一頭齊陰、長度到耳珠嘅冬菇頭髮型，油咗紅色嘅指甲；男子喺唔同嘅照片有唔同髮型，有啲係短到光頭咁、有啲就係長少少嘅及耳短髮。喺每一張照片，佢哋兩個人都會以唔同姿態同裝束、一齊或單獨出現喺唔同嘅場景，包括有全身嘅影像或者人體局部嘅特寫，有啲着住衫，有啲只係着住貼身內衣；有啲喺室內拍攝，有啲就身處戶外場景。以下係其中兩張照片：
《金滑鼠》，係廖逸君喺2014年創作嘅橫度彩色照片，高75厘米，長100厘米。 作品係用近鏡拍攝一隻出現喺黑色平面上面嘅金色滑鼠；有兩隻右手，一隻疊住另一隻咁，撳喺嗰隻金色滑鼠上面。一隻搽咗鮮紅色指甲油嘅右手喺最上面，呢隻手睇落柔軟纖細，似係女人嘅手。佢下面嘅另一隻右手就大隻啲，指甲好短，無搽指甲油，似係男人嘅手。兩隻手都手背向天，手指向住畫面左邊，緊密咁一上一下疊住。而男人手下面撳住嘅，係一隻金色鏡面滑鼠，滑鼠嘅表面映照出廖逸君嘅身影。喺漆黑嘅背景中，帶有鮮紅色指甲嘅手好突出，睇起嚟，就似嗰隻女人嘅手控制住男人嘅手去操作滑鼠咁。
《精神控制是女性的必備技能》，係廖逸君喺2010年創作嘅直度彩色照片，高127厘米，長約95厘米，係展出嘅六幅作品之中最大嗰幅。 照片中，有一個剷青髮型嘅男士，佢雙眼望向斜下方，頭頂兩側畀一對張開嘅手罩住，呢對手搽咗鮮紅色嘅指甲油。呢位男士着住淡紫色嘅T恤，只係見到頭到胸口位置。佢身後有一個人，見到佢膞頭到臀部位置，同埋一對手，佢手指撐開，成隻爪咁罩住男士嘅頭，好似用緊無形力量操控住個男士嘅思想。