旁述：

呢件作品嘅名稱係《M+遊戲地景》，由三組雕塑同埋一組長椅組成，係以野口勇嘅創作概念以及佢嘅作品為藍本而設計，喺2020同2021年製造，分散裝設喺M+大樓三樓嘅天台花園戶外平地上。

第一組雕塑《Octetra》（多種構形），以強化纖維塑膠製作。雕塑似係獨立一件，或者係多件疊起嘅積木，分布喺天台花園嘅一角。積木呈紅色，每舊高過半道門，外形似一個三角錐體切去四隻尖角，即係每舊積木有八個面，平整切去四隻尖角嘅切面係小三角形，其餘四個面就係六角形。六角形嘅中間開窿，貫穿去另一面嘅六角形，窿嘅大細足夠比人爬過對面，觀眾亦可以透過呢啲窿睇到另一邊嘅景物。呢啲積木有啲獨立放置，有啲就兩件或三件疊起。

第二組雕塑係「兒童之國」嘅遊玩金字塔，以玻璃纖維強化混凝土製作。呢組雕塑好似一個平頂金字塔，基座係正方形，再十字形咁垂直切開成四等份；每份之間有通道，由外圍走入任何一條通道都可以去到金字塔嘅中心。金字塔整體呈灰白色，有一道門咁高；結構就好似梯級咁向上層層收窄，梯級分為三層到六層不等，但塔頂高度一致，即係分三層嘅部分每層比較高，分六層嘅部分每層就比較矮。梯級唔同嘅位置有一個個方方正正嘅缺口，似係嗰一層嘅梯級被垂直切開，整齊咁將梯級分開左右。如果由平地走上塔頂，有啲路徑需要左右跨步行。

第三組係遊玩小丘，以玻璃纖維強化混凝土製作。雕塑好似一個圓球體喺平地冒起，形成圓拱形嘅小山丘。小丘呈灰白色，表面平滑，高度大約去到成人嘅胸口。

圍繞住遊玩小丘，有一圈斷開咗三截嘅弧形長椅，佢哋係「加州情景園」長椅，由花崗岩製成。呢三張弧形長椅，其中一張嘅尺寸較大，係同「加州情景園」嗰張一樣大，另外兩張就縮細咗少少。三張長椅都有高嘅靠背，全部座位都向住遊玩小丘，靠背同座位之間留有凹坑。每個座位都有平均而且垂直嘅接合位，令到長椅好似由一個個座位模組拼合而成。

收聽

野口勇 《M+遊戲地景》

野口勇《M+遊戲地景》