巴勃羅・畢加索 男子肖像

伍曉銓：

呢個有深色頭髮同鬍鬚嘅不明男子，一個人坐喺類似咖啡室或者酒吧嘅地方。昏暗嘅燈光喺簡樸嘅牆上留低陰影，牆上只係掛咗一幅黯淡嘅風景畫。

呢幅肖像畫屬於畢加索嘅「藍色時期」，當時佢悼念緊佢嘅好朋友卡洛斯．卡薩吉馬斯。喺1900年，卡薩吉馬斯陪畢加索一齊去咗巴黎，相隔短短一年，佢喺試圖謀殺一位拒絕咗佢嘅女性失敗之後，就結束咗自己嘅生命。喺呢段時期，畢加索經常描繪社會邊緣人物，畫作入面陰沉嘅藍色色調好似表達緊佢嘅悲痛。

畢加索1904年喺法國定居。當佢仲喺巴塞隆拿嘅時候，已經着眼描繪邊緣人物，例如行乞嘅人、無家者同埋監獄裏面嘅婦女。呢段時間就係藝術歷史學家後來所講嘅畢加索藍色時期，由1901年持續到1904年。

究竟係咩令到畫入面嘅呢個人睇落咁孤單同憂鬱呢？可能喺創作呢幅畫嘅時候，一向超越社會常規、同主流對抗嘅畢加索亦喺度反思自己身為局外人嘅經歷。

旁述：

呢件作品嘅名稱係《男子肖像》，係巴勃羅・畢加索喺1902至1903年間創作嘅油畫，高93厘米，長78厘米。

作品以陰冷嘅灰藍色為主調，粗壯嘅筆觸，描繪一位着住深色外套嘅男士坐喺一片灰藍色嘅環境之中。佢繑埋雙手放喺腰間，目光低垂，好似心事重重咁。

呢位男士頂着一頭濃密嘅短曲髮，髮色係深藍帶幾抹淺灰藍色。佢露出前額，鬍鬚從髮鬢連住面頰同成個下巴，加上佢個鼻高挺筆直，顯得佢塊面分外修長。男士嘅面色枯黃，眼窩深邃，雙目無神，呆望下方。佢着住深灰藍色厚西裝外套，領口露出白中帶藍色嘅裇衫衣領，外套嘅腋下位置有幾道皺摺，似乎係因為男士繑埋雙手，將雙臂往身體夾緊而形成摺痕。男士下方有一抹顏色，係唔均勻嘅啡色，大概有成年人一隻手掌咁闊，睇起上嚟，男士就好似坐喺一張木枱後面。男士身後係一片灰藍色嘅背景，上半部分比較淺色，而下半部分就比較深色，男士似乎靠住淺灰藍色嘅牆，坐喺深灰藍色嘅長梳化上面；而男士嘅影子淡淡咁投射喺右邊嘅牆上。牆壁左上角有一幅風景畫，顏色同牆身一樣係灰藍色，只用黑色線條勾勒郊外景色。

畫嘅右上角有畫家嘅署名。