M+希克藏品（捐贈），香港，© 顏磊，圖片：M+，香港
旁述：
顏磊喺2002至2003年間創作咗十一幅以動物為題嘅畫作，描繪十二生肖中，十一種真實存在嘅動物。而喺2023年開幕嘅「M+希克藏品：別傳」展覽中，就先展出其中六幅作品，作品名稱分別係《兔》、《蛇》、《馬》、《羊》、《猴》、《雞》；而喺2024年農曆新年前後，《猴》就會換上另外一幅作品《鼠》。全部作品都係塑膠彩布本，有直度同橫度，最高嗰幅係《兔》，高196厘米，長138厘米，厚2厘米；最窄長嘅嗰一幅係《蛇》，高約66厘米，長138厘米，厚2厘米；而其餘作品高約138厘米，長約140厘米，厚2厘米，近似方形。
每幅作品各自描繪咗一款動物，外型同形態都同真實嘅動物相似。動物嘅輪廓同身上嘅紋理，以及周邊環境，都用色塊呈現，顏色包括黑色、白色、以及唔同深淺嘅灰色。
靠近睇，動物嘅眼睛、毛髮同背景細節模糊，色塊係一層層咁由深變淺，或者由淺變深，呈現動物嘅輪廓。離遠睇，就會見到呢啲色塊組合成動物嘅完整形態。以下係其中兩件畫作：
畫作《兔》，係描繪一隻長耳兔，兔仔幾乎佔據全個畫面，似踎喺平地，四肢着地，正面面向我哋。一對豎起嘅長耳仔比兔仔嘅面更大。日光之下，背景偏灰白，兔仔嘅一邊身較光亮，另一邊身偏暗，形成強烈對比。
畫作《蛇》，係描繪一條蜷曲嘅蛇，蛇身粗壯有條紋色塊，色塊係黑色同淺灰色相間，黑色嘅色塊較淺灰色嘅闊。蛇頭橫伸向右，蛇身繑成阿拉伯數字8字，佔據畫面中間至左邊嘅空間。