野口勇 《雨山》

旁述：

野口勇有一系列以熱浸鍍鋅鋼作為創作材料嘅雕塑作品。喺2024年開幕嘅「山鳴水應」展覽中，一個靠窗嘅長方形展區，就展出咗其中五件作品，分別係《雨山》、《形成中的山脈》、《風斗》、《天鏡》，同埋《根與莖》。全部雕塑都係以野口勇喺1982至1983年間嘅創作概念為藍本，然後分別喺1984同2019年製造。每件雕塑都主要係一塊塊熱浸鍍鋅鋼板，經切割成唔同形狀，再嵌砌或者接合組成。切割嘅邊緣俐落，拼合後嘅外型線條簡約。呢啲鋼板，類似街道工程臨時鋪喺地面常用嘅鋼板材料，全部顏色都係淺灰色，色澤會隨住光線亮度而改變，光線充足嘅時候，雕塑顯得特別明亮，而光線昏暗嗰陣，就會顯得暗淡，帶藍色調。每件雕塑尺寸由高約26厘米至3米不等。

喺呢個展區，《形成中的山脈》放喺近中央位置；《雨山》、《風斗》同埋《根與莖》呢啲較高嘅作品就分別放喺三個近角落嘅位置；《天鏡》就放喺近玻璃窗嘅位置。以下係其中兩件作品嘅描述：

《天鏡》高約26厘米，長約50厘米，闊43厘米，係一塊接近正方形嘅淺灰色鋼板，下方有鋼片支撐，將方形鋼板其中一側向上提起至一張打直嘅A4紙嘅高度，令鋼板嘅另一側斜向地面。呢件作品設置喺展區面向藝術公園嘅落地玻璃前面，隨住天色變換，鋼板會映照由窗外透射入嚟嘅陽光，有時會因應光線反射角度而發亮，有時就會較為暗淡。

另一件雕塑《雨山》高約246厘米，長約64厘米，闊73厘米，外型似幾條水柱落喺高聳嘅山林之間。作品由四塊狹長嘅鋼板同兩塊長方形鋼板組合而成。其中一塊長方形鋼板平放喺地面，四塊狹長嘅鋼板就由左至右豎喺長方形鋼板上面，而另一塊長方形鋼板，就喺狹長鋼板之間靠上位置，貫穿四塊狹長鋼板。狹長鋼板面向嘅角度各有不同，好似我哋合埋手掌，再將尾指貼合，然後微微打開手掌咁樣。表面光滑嘅鋼板，會反映住另一塊鋼板嘅剪影，造成一道道有如山溝嘅陰影，或者好似喺山林之間向下流淌嘅一條條水柱。