《關係項──鏡之道》（2021／2024年）於「山鳴水應」展覽現場，2024年，© Lee Ufan / ADAGP, Paris – SACK, Seoul, 2024，攝影：鄭樂天，圖片由M+提供
旁述：
呢件作品嘅名稱係《關係項——鏡之道》，係李禹煥喺2021年創作嘅雕塑裝置作品，宜家展示嘅版本係由藝術家喺2024年因應M+展廳空間而重新設計。作品嘅創作物料包括石頭、不鏽鋼，最大嘅石頭高90厘米，長方形不鏽鋼板長10米，闊1米。
作品喺地面上將兩塊銀色不鏽鋼板合併成長條形，長邊嘅中央兩側放有兩嚿深啡色石頭，而鋼板周圍鋪滿指頭大細嘅碎石。銀色鋼板嘅表面有如鏡面，可見兩嚿石頭同周圍環境嘅鏡像。
兩嚿石頭差唔多大細，高度大約去到成人大髀咁高。石頭嘅表面粗糙，形狀不規則。呢兩嚿石頭並列擺放，彼此相距大約一個人嘅身位，佢哋分別放置喺長條形不鏽鋼板兩條長邊嘅中間點。鋼板總長10米，闊1米，加上鏡像嘅效果，睇起嚟就好似兩對石頭啱啱好將鏡面夾喺中間。周圍嘅地面密鋪白色帶黑點嘅花崗岩碎石；碎石將石頭同鋼板完全圍喺中間，同平滑嘅鋼板形成強烈對比。
喺2024年開幕嘅「山鳴水應」展覽中，作品設置喺一個長方形展廳嘅一側，約佔整個展廳嘅一半空間。呢半邊空間除咗塊鏡以外嘅地板鋪滿密密麻麻嘅碎石，而觀眾進入展廳嘅通道就喺展廳嘅另一側。觀眾可以從展廳嘅玻璃幕牆見到香港嘅地景，同時自然光亦可以透過玻璃幕牆引入室內，光線會隨住日照時間喺作品上移動。
如果觀眾喺作品外圍嘅通道邊行邊睇，就好似遠觀一道變化萬千嘅風景。如果踏過碎石，沿住光滑嘅不鏽鋼板行走，又好似喺自己嘅倒影上行走咁樣。