巴勃羅・畢加索 聖心教堂

馮樂山：

請停低欣賞吓呢幅未完成嘅畫。你會開始見到教堂嘅輪廓逐漸浮現。呢座，係巴黎蒙馬特山上嘅地標，聖心教堂。二十世紀初，蒙馬特係藝術家嘅熱門聚居地，畢加索就喺嗰時候搬去呢度。

畢加索幾乎每日都會見到呢座當時仲興建緊嘅教堂。佢開始諗點樣喺平面畫布上去呈現呢座教堂嘅所有角度。你可以睇到佢用咗幾何形狀同線條，去描繪建築物同周邊環境。留意吓圓頂、尖塔同附近嘅房屋，佢哋都以碎片形式呈現，而唔係完整嘅畫面。試想像喺教堂周圍行走，用唔同嘅角度去睇佢，呢個就係畢加索想我哋睇到呢幅畫嘅時候獲得嘅體驗。呢幅係佢早期探索立體主義嘅作品，呢種藝術風格由佢同喬治．布拉克一齊開創，將物件解構成幾何形狀同多重視點。

畢加索並未完成呢幅作品，但係佢一直珍藏呢幅畫作，直至離世。

如果想了解更多關於畢加索嘅創作突破，可以去你身後面嗰間房，睇吓入面介紹佢早期立體主義作品《亞維農的少女》嘅影片。

旁述：

呢件作品嘅名稱係《聖心教堂》，係巴勃羅．畢加索喺1909至1910年間創作嘅油畫，高約93厘米，長65厘米。

作品似係草稿，或者未完成嘅畫作，只用短促嘅線條、簡略地勾勒出巴黎蒙馬特聖心教堂同周遭嘅景物。線條斷斷續續，構成一個個大小不一、唔完整嘅幾何形狀，有如交錯嘅碎片，展現山上嘅聖心教堂到山下嘅城市風光。

畫面渲染咗一片淡淡嘅奶茶色，而主體建築就帶有淡淡嘅灰白色。主體建築位於畫作中央偏上，描繪聖心教堂嘅拱形門廊同石柱，而教堂嘅圓頂就喺門廊之上若隱若現。而喺門廊之間，就透現一個細小嘅圓頂建築。畫中有一條條灰黑色線，組成好多個唔同大細嘅幾何形狀，呈現位於高處嘅教堂到低處城區嘅面貌。景色好似光影嘅碎片咁，由教堂，往下一層疊住一層咁擴散呈現。

仔細睇，城中有高高低低嘅建築物，有斜頂、尖頂同平頂，似係房屋、圍牆、拱門等。喺畫面中軸位置嘅景物描繪得較為仔細，清晰見到建築物錯落有致咁重疊，並塗上白色同灰白色，增添明暗對比，凸顯立體感同層次感；而喺畫面嘅其餘部分，則係一啲較淺色同疏落嘅線條，展現出遠離教堂嘅景物較為模糊嘅空間感。