M+，香港 © The Estate of Ana Mendieta Collection, LLC Courtesy Galerie Lelong & Co., New York Licensed by the Artist Rights Society (ARS), NY。圖片：M+，香港
旁述：
呢件作品嘅名稱係《血腥的輪廓》，係安娜．曼迪耶塔喺1975年創作嘅錄像作品，作品係彩色、無聲嘅單頻道超8毫米菲林轉高清數碼錄像，片長1分51秒。
整段錄像都影住同一個河岸，藝術家安娜．曼迪耶塔赤身裸體，躺臥喺河岸嘅泥濘之中。佢白皙嘅成年女性身體嵌入泥濘，形成一個有住女性曲線輪廓嘅凹坑，坑裏面注滿血紅色嘅液體。
錄像一開始，藝術家赤裸仰臥喺泥濘度，佢合埋雙眼，雙腳拍埋一齊，手臂一左一右攤開，手肘屈曲，手掌喺頭嘅兩側，手心向天，成個人嵌入泥濘之中。然後，畫面顯示同一個場景，同一個取鏡角度，但係藝術家今次唔喺畫面入面，只係留低一個深深嘅人形凹坑。之後，畫面又呈現一模一樣嘅場景同角度，今次人形凹坑注滿紅色液體，變成一個彷彿充滿鮮血嘅人形剪影。最後，畫面嘅場景同角度依然一樣，但係藝術家再度出現，佢俯伏喺凹坑，成個人浸喺紅色液體上面，睇起嚟，就好似一具倒臥喺血泊中嘅屍體。
鏡頭切換之間，泥濘同藝術家身上閃爍住光影，若隱若現，就好似日光穿透樹葉嘅間隙，灑落喺大地同埋藝術家嘅軀體上面。