黃永‎砅 《六走向的小轉盤》

旁述：

呢個究竟係一件工具定係藝術品？從唔同角度嚟睇，兩樣都係。作品由黃永砅喺1989年創作，好體現到佢當年對藝術睇法嘅轉變。深受中國古代占卦文獻《易經》影響，黃永砅好想抗衡當代崇尚自我表達嘅思潮，反而將創作交託俾命運同機遇。

沈遠：

自從[19]85年之後，佢想從個人嘅創作中退出嚟，譬如靠《易經》占卜去決定做咩。將點樣創作、幾時創作呢啲嘢交比呢啲小轉盤去決定。

旁述：

沈遠係黃永砅嘅太太。佢話俾我哋知，藝術家點樣用啲小轉盤嚟決定創作形式。

沈遠：

例如第一個小轉盤，決定要唔要行動，即係要唔要創作。第二個轉盤呢，就決定喺咩地方行動，喺轉盤上有標示。第三個轉盤就決定幾時採取行動。然後第四個轉盤就決定用乜野創作。第五個轉盤決定佢點樣做。第六個小轉盤決定參考咩嘢去做。所以佢上面嘅標注，都用嚟喺旋轉嘅過程中決定要點做。

旁述：

沈遠本身都係一位藝術家，我哋問佢同丈夫喺伴侶關係以外，會唔會以朋輩身份討論作品。

沈遠：

會呀，我哋每日都會傾。無論係佢做咩計劃，都會問我對計劃嘅諗法。當我有創作計劃嘅時候，我都會問佢對我個計劃嘅諗法。但係，我哋有時會改少少，有時會堅持自己嘅諗法。並唔會因為對方提出嘅任何意見而完全咁改變自己，我哋只係喺討論中加強或確定自己某啲諗法。

旁述：

呢件作品嘅名稱係《六走向的小轉盤》，係黃永砅喺1989年創作嘅裝置作品，物料包括皮箱、木、墨水同黑白照片。長方體皮箱打開後嘅尺寸係：高57厘米，長44厘米，闊77厘米。

黑色手挽皮箱內，有三條白色嘅方形木條，晾起一疊六個木製嘅圓形轉盤；呢啲轉盤由下向上、由大到細疊起，全部以圓心為轉軸。每個轉盤都上咗一層白色油漆，但有剝落嘅痕跡。靠近轉盤邊緣，印有淡黑色嘅阿拉伯數字刻度。皮箱上蓋嘅內部，附有一張套住透明膠套嘅白紙，印有呢件作品嘅黑白圖像、簡體中文嘅手寫註解，同埋英文參考資料。呢啲圖文註明每一個轉盤點樣決定創作一幅畫嘅各項元素，包括構圖、繪畫時間同埋用到嘅材料。而印喺紙上面嘅作品圖像，同作品實物一樣係打開咗嘅黑皮箱同白轉盤，而皮箱上蓋亦附有一個白色轉盤嘅圖像。

以下係手寫註解同轉盤嘅細節描述：

頂層最細嘅轉盤係「頂蓋束」，註解標示為「動與不動，就是製作與不製作」，括弧「兩可」。喺「動」與「不動」下面分別括住數字「1」同「0」。轉盤上寫住「黃永砅1989.2」，只見到一個刻度，寫住「0」。

第二層轉盤係「前置束」，註解標示為「何處動」，括弧「空間位置規定」。圓周有八個刻度，平均分布。由零開始，每個以45度遞增至360度。

第三層轉盤係「中堂束」，註解標示為「何時動」，括弧「小時」，印有「1」至「24」嘅刻度。

第四層轉盤係「後束」，註解標示為「動甚麼」，括弧「材料」，印有「1」至「64」嘅刻度。

第五層轉盤係「薄束」，註解標示為「如何動」，括弧「無序數字」，轉盤上嘅刻度密密麻麻，由個位、十位到百位都有。

第六層轉盤，即係最底一層，呢一層係「楔束」，註解標示為「何參照」，書名號《當代藝術》，「藝術史三百九十二幅圖片」，印有「1」至「392」嘅刻度。轉盤上嘅刻度密密麻麻，數字排列嘅高低同方向都有唔同變化，有啲排成斜行，有啲打橫排成幾行而且上下交錯，辨別唔到數值。另外有部分數字已經剝落。