© M+，香港，圖片由M+提供
旁述：
呢件作品嘅名稱係《天地情之十五》，係王無邪喺2003年創作嘅水墨設色紙本，高215厘米，長約120厘米，大細約有一道門咁大。
呢幅直度水墨作品，成個畫面有密集嘅黑色墨點同埋彎曲嘅黑色線條，似喺半空俯瞰河流，流水喺高低起伏嘅土地上流淌。畫面下方，墨點同線條較為密集，墨色較為濃重；而喺畫面上方，留白處比較多，墨色比較淡。由下而上咁睇成幅作品，就好似由近景望向遠方嘅景色。
畫面嘅近景，有十幾個較明顯嘅墨點，呢啲墨點拉長，睇落似生咗一條尾巴，佢哋正游向畫面下方，就好似游近我哋咁樣。大嘅墨點連尾巴約有成人一隻手掌咁長，細嘅就約有成人一節食指。墨點集中喺中央位置，墨點之間嘅曲線有較多留白，似河流泛起疏落嘅波紋；而畫面兩側嘅曲線同埋夾雜嘅色塊就比較密。睇起嚟，呢啲墨點、曲線同色塊嘅形態，就似海面上飄浮嘅油跡，有啲正在擴散，有啲積聚埋一齊。
畫面上方嘅遠景，留白較多，如煙似霧。流動嘅墨色較淡，漸變成淺灰色，線條亦較幼，有啲線條向上延展開去，似油污向遠方擴散。