夏洛特·波澤嫩斯克 《D系列方管》

旁述：

幾年前，M+邀請景觀建築師黄志恆重新組裝夏洛特・波澤嫩斯克嘅模組式雕塑。波澤嫩斯克一直想像佢嘅作品可以因應展覽空間或者建築脈胳，組裝成唔同組合嘅形狀。我哋請黄志恆回顧一下，2019年喺M+展亭組裝作品部件嘅經歷。

黃志恆：

對我嚟講，佢嘅作品之中最吸引我，亦都係最重要嘅部分，就係模組嘅設計。但同時，佢又俾其他藝術家或者觀眾去自由演繹呢啲模組，令人人都可以對作品有自己嘅演繹。想像一下，同樣嘅元素、同樣嘅組件同材料，以前都被藝術家掂過，然後我又掂佢，跟住我改變佢，甚至係改造佢。呢個係我同藝術家之間一種非常特殊嘅聯繫。

旁述：

面對咁多模組同可能性，黃志恆開始嘅時候冇將佢哋視為一個連貫嘅實體，而係將佢哋當做獨立組件嚟看待。

黃志恆：

當我們思考模組嘅設計嗰陣，通常會將模組視為整體嘅一部分。所以，我們將模組放埋一齊，形成一個實體或一個作品。但係，我開始思考，我哋可唔可以將一個模組睇成一個獨立嘅個體呢？有佢自己嘅身份呢？我越來越覺得，我哋成日將模組睇成係整體嘅一部分，但事實上，每個模組，只要放喺唔同嘅情況之下，用唔同嘅方式將佢哋連埋一齊，就可以變成另外一樣嘢。

旁述：

喺2019年，黃志恆將呢啲獨立模組喺場地裝置好之後，望住佢行咗個圈，發現更多獨特之處。

黃志恆：

我記得當時有一件作品喺地上面。第一次我可以望穿佢，仲可以睇到光線穿過物料之後嘅改變，雖然光由窗口射入嚟，但係有一點點光由雕塑裏面發出嚟，我仲可以聽到環境聲。呢啲都係我整緊模型嘅時候冇辦法體驗到嘅，你一定要親眼見到實物。

旁述：

依家喺M+ 展出嘅呢個組合，同黃志恆嘅版本截然不同。不過，你依然可以用同樣方法探索呢個作品：花啲時間喺呢個空間走動，觀察下獨立模組同空間嘅互動，賦予波澤嫩斯克嘅作品全新意義。

旁述：

呢件作品嘅名稱係《D系列方管》，係夏洛特・波澤嫩斯克喺1967年創作嘅裝置作品。M+收藏咗2014年再製作嘅版本，當中包含十六個組件，總共有六個款式，物料包括熱浸鍍鋅鋼同螺絲。組件展示數目同空間尺寸視乎組裝方式而定。

組件係根據同一套標準製成嘅零件，有唔同嘅款式，可以因應策展需要同展出場地空間特性，靈活調整同構建成唔同形狀。組裝後，作品就好似一條銀色嘅長方形通風管道，可以獨立放置喺地下，可以依附喺牆身同天花板，又或者可以懸掛喺半空。 例如，可以將管道砌成一個成人咁高嘅英文U字，座地展示；亦可以靠牆，組裝成煙囪嘅形狀；又或者將兩截管道分別裝設喺一幅牆嘅前後兩面，令管道睇起嚟好似穿牆過壁，喺一邊牆入，另一邊牆出，造成視覺上嘅錯覺。

六款組件各自都係一條空心嘅立體方形管道，長短不一，兩邊嘅開口呈正方形或者長方形，而開口嘅切面有啲係垂直有啲係斜切。

組件款式包括：第一款「長方管」係一個兩邊開口都係長方形嘅長管；第二款「正方管」都係長管，但兩邊開口係正方形；第三款「立方管」，兩邊開口同樣係正方形，但係管道比較短，睇落似一個立方體；第四款「過渡組件」係梯形短管，一邊開口係正方形，可以接上同樣係正方形開口嘅管，另一邊開口係長方形，佢嘅大細啱啱好係正方形開口嘅一半，可以接上其他長方形開口嘅管；第五款「角件」係呈三角形嘅短管，佢嘅兩邊開口都係斜切，當佢接上其他組件，管道方向就可以轉45度；最後一款「T形組件」，分別喺3點、6點同9點鐘方向有一個正方形開口，當佢接上其他組件，管道方向就可以分岔成兩條分支管道。