田名網敬一 《畢加索〈母子像〉之悅樂》系列

伍曉銓：

睇吓呢組好似畢加索畫作嘅藝術品，你有冇發現一啲唔尋常嘅細節，例如卡通化嘅元素，甚至係米奇老鼠？其實，呢啲作品出自日本藝術家兼平面設計師田名網敬一嘅手。喺新冠肺炎爆發初期，田名網同我哋好多人一樣，都覺得孤單，好似與世隔絕，睇唔到呢場疫症嘅盡頭咁。為咗提起精神，佢決定重拾細個嘅時候畫畫嘅樂趣，重畫藝術界前輩畢加索嘅作品。佢喺呢個過程中搵到慰藉。佢話：「只係單純摹繪我鍾意嘅嘢，唔使經過太多思考，就係一件好有趣嘅事，仲安撫咗我嘅身心。」

對田名網嚟講，畢加索係一位體現到創作嘅樂趣嘅藝術家。呢個系列既係向畢加索致敬，又係自我療癒嘅行為。田名網畫咗超過五百幅同類作品，直到2024年離世為止，呢批作品成為咗佢嘅遺作。睇住呢啲色彩繽紛嘅畫作，佢哋提醒我哋，創作，特別喺困難嘅時期，可以帶嚟安慰同意義。

旁述：

田名網敬一喺 2020至2024年間創作咗超過500幅以《畢加索〈母子像〉之悅樂》為題嘅塑膠彩布本作品。而喺2025年開幕嘅「畢加索──與亞洲對話」展覽中，就展出咗其中34幅。作品尺寸不一，邊長介乎30至66厘米之間。呢個系列嘅作品，構圖同表現手法都帶有巴勃羅．畢加索嘅影子，例如將從唔同角度描繪嘅人物細節特徵，組合喺同一個畫面裏面，或者將畢加索畫過嘅主體融入自己嘅作品之中；又或者喺畫面呈現扭曲變形嘅肖像、明顯嘅筆刷塗抹痕跡、密集嘅圖紋同幾何形狀、飽滿而對比強烈嘅色彩等等。以下係其中兩幅畫作：

呢一幅 2020至2021年間創作嘅作品，描繪大眼紅唇嘅人，佢着黃色衫同紅色裙或者褲，坐喺有扶手同靠背嘅凳上面，望向畫面左邊。喺一片淡灰綠色嘅背景色前，人物嘅頭到大髀幾乎佔去成個畫面空間，佢頭大身細，頭部佔畫面嘅一半。呢個人戴住一頂帽，帽冠係啡色，喺畫面左邊嘅帽邊係藍色、喺右邊嘅帽邊係紅色，紅藍色之間似夾住一片綠色裝飾。人物五官唔對稱，似係將兩塊唔同角度嘅面組合埋一齊：畫面左邊嘅眼睛較高，見到成隻眼嘅正面；而右邊就描繪咗一隻眼睛嘅側面。呢個人嘅鼻由兩個相同方向嘅鼻翼組成，而其中一隻耳就喺畫面右上方嘅額角斜向上。佢雙手搭喺張凳嘅扶手上面，手指扭曲交疊。呢個人嘅姿態，同畢加索喺1937年創作嘅一幅名為《雙手抱胸坐着的女人》嘅畫作好相似。而呢個人嘅大髀上，有一個去到佢下巴咁高嘅灰色人像。人像似無身軀，得頭同四肢，形態就似呢個人原本面向右邊然後彎身向後拗嘅一刻。人像用一隻腳同一隻手支撐身體，另一隻腳向左反向後，淨低嘅手凌空垂喺右邊，頭部就喺兩腿之間。呢個灰色人像嘅形態同用色，同畢加索喺1930年創作嘅一幅名為《雜技演員》嘅畫作完全一致。

另一幅喺2020年創作嘅作品就描繪一對母子。企喺孩子正後方嘅母親佔滿整個畫面，身體包覆住孩子成個背面。佢低頭垂眼望住孩子，側住嘅頭同膊頭連成寛闊嘅弧形，顯得身形龐大豐滿。母親嘅雙手從後握住孩子嘅兩隻手，似喺背後扶住啱啱學行嘅孩子。而孩子戴住好似米奇老鼠咁有兩隻圓形耳朵嘅黑色帽，着住一身似超人服飾嘅紅色同藍色衫褲，一隻腳屈膝，另一隻腳邁步向前踏。佢五官唔對稱，兩眼一高一低。喺黑色背景下，顏色鮮艷嘅人物尤其突出。喺畫嘅左上角，有白色文字寫住田名網敬一嘅英文名，同埋創作呢幅畫嘅年份數字2020，仲有紅色數字同英文字寫住38PICASSO，代表田名網敬一喺3月8號完成呢件作品。而喺右上角，就有畢加索嘅名、畫作《母子像》嘅名稱，同創作年份數字1943。