巴勃羅・畢加索 游泳者

馮樂山：

我哋行近啲，圍繞住呢組雕塑望吓。佢哋係三個喺海灘享受緊嘅人：一個男人企喺碼頭，緊握雙手；一個女人喺跳板度準備跳水；仲有一個細路仔游緊水。你分唔分得出邊個打邊個呢？

畢加索好鍾意去沙灘。當佢創作呢啲雕塑嘅時候，佢住喺海邊嘅城市，法國康城。離佢屋企幾分鐘路程就有一個沙灘，佢成日同屋企人同朋友去嗰度玩。

你可能發現另一樣有趣嘅係，呢啲雕塑嘅物料材質有啲唔尋常。喺康城，畢加索認識咗一啲垃圾場同清拆工程公司嘅經理。佢哋會提供廢棄木材畀佢用嚟做雕塑模型。畢加索首先用舊相框同其他棄置嘅零碎木材砌出雕塑，然後用青銅鑄造，就變成我哋而家睇到嘅版本。好似魔術咁，畢加索將廢棄嘅木材轉化成為青銅雕塑，幾個優哉游哉嘅沙灘遊人就係咁樣誕生。

旁述：

呢三件雕塑嘅名稱分別係《游泳者：雙手合握的男人》，《游泳者：小孩》，同《游泳者：張開雙臂的女人》。佢哋都係巴勃羅．畢加索喺1956年以青銅創作嘅作品。

三件雕塑嘅顏色都係深啡色，以唔同嘅幾何形狀砌成人形，分別係緊握雙手放喺腹部嘅男人、大頭圓面嘅小朋友同張開雙臂嘅女人。

最高嗰件作品係《游泳者：雙手合握的男人》，高約214厘米，長73厘米，闊36厘米，大約有一道門咁大。作品似一個身材高大嘅男人，體形修長，線條簡潔利落。男人膊頭好橫，顯得個頭好細；佢面上，同身體，都有簡單線條刻痕，勾勒出眼、鼻、嘴、胸肌、胸骨同腹肌。男人嘅頭係長方形；頸係長三角形；膊頭同胸部係一塊倒三角形；而由胸口到腳，係一塊長形銅片組成；佢嘅膊頭同手臂，仲有緊握嘅雙手，就由一個長方形嘅幼條框架組成。整個雕塑似一個男人谷起胸肌展示身形線條咁。

最細嗰件作品係《游泳者：小孩》，高約136厘米，長67厘米，闊46厘米，高度略高過半道門。作品係一塊圓形銅片加上一條窄身長銅片組成，似小孩渾圓嘅頭部同幼小嘅身軀。大圓面上有菱形青銅塊同長形青銅條，係小孩嘅眼同鼻，圓面下方係窄身長銅片嘅頂部，似係小孩嘅嘴咁。小孩嘅身體中間位置，兩邊各有一條幼銅枝，打斜向下連接住底座，就好似孩子撐開隻腳，又或者係從水面探頭，露出上半身同兩臂。

作品《游泳者：張開雙臂的女人》，高約198厘米，長174厘米，闊46厘米。作品以一條長條做女士嘅頭同身，有帶尖角嘅銅片做女士攤開嘅手掌，佢兩條好幼嘅手臂，一條斜向上、一條斜向下咁張開。斜向下嘅嗰一邊手臂，頭肩位置相連，形成一個三角形，就似係一把長髮搭喺膊頭度。女士嘅頭有幾條短坑紋同一個小點，似係佢嘅眼、鼻同嘴。佢嘅胸口係呈正方形，下端連接住一個長方形，就係佢嘅腳。女士嘅身同腳都有彎曲或者平行嘅坑紋，似波浪又似木紋。