蔡國強 《二十世紀項目：有蘑菇雲的世紀》（照片記錄）

旁述：

呢啲相入面記錄咗藝術家蔡國強一系列嘅作品。煙花同火藥經常喺佢嘅作品中出現，我哋想知道原因。

蔡國強：

嗰陣，我感到自己受到當時中國社會嘅控制，另一方面我天生就似我爸爸比較細膽謹慎。於是想搵一種可以反抗控制、反抗自己天性嘅媒介，就係後來嘅火藥。我選擇火藥係因為佢令我更自由，同時我自己又知道點樣規範同埋控制呢個媒介。

如果要喺二十世紀搵一個最大嘅世界符號，就非原子彈蘑菇雲莫屬。原子彈計劃亦叫「曼哈頓計劃」。

旁述：

蔡國強喺1990年代創作咗呢幅作品，呢個係佢作為藝術家一個重要嘅里程碑。聽佢講返當時做嘅嘢實在係非常精彩。

蔡國強：

呢件作品喺1996年2月到4月期間喺美國嘅唔同地點實驗，每次爆破持續約三到六秒。

經過美國聯邦調查局、國防部同埋能源部嘅批準，我成為第一個拎中國護照進入核試驗基地嘅人。我帶埋助理，喺拉斯維加斯賭場嘅酒店，偷偷地將喺中國城買嘅炮仗藥，同埋用傳真機紙管做發射筒，組裝成小小嘅手提炸彈帶入基地。我趁陪同人員唔為意，就砰一聲發射，手上出現一朵小小嘅蘑菇雲。

我哋好快就被制止，基地打電話去華盛頓。喺總部指示下，佢哋即刻極速揸車過嚟，檢查我用嘅爆炸物。我啲炮仗藥喺佢哋嗰啲核武專家嚟睇，簡直國際笑話。幾個月後，接到華盛頓要求，要匯報幾個參與者嘅身體有冇異常。同我一齊入去嘅日本技術總監就答：「放射線好呀，返嚟之後我太太就有左嘞！」

旁述：

「有蘑菇雲的世紀：為二十世紀作的計劃」係蔡國強喺1996年進行嘅爆破行為展演。藏品中有八張彩色嘅橫度照片作為紀錄，呢啲照片喺2007年以噴墨印刷，各高64.6厘米、長91.5厘米。

照片拍攝藝術家本人分別企喺八個唔同嘅地點，燃放火藥，進行爆破行為展演。每張照片都有一朵小型嘅蘑菇雲升起。

展演地點都係喺美國具歷史意義或者藝術意義嘅地方，包括：紐約曼克頓、內華達核試驗基地、猶他州大鹽湖嘅雕塑作品附近等等。照片喺日間或者黃昏時分拍攝。照片中，藝術家站立嘅位置同鏡頭有一段距離，佢背向鏡頭，面向遠方唔同嘅景觀，包括：曼克頓商業區密集嘅高樓大廈、自由女神像、設置喺荒地中嘅核試驗基地、喺大鹽湖邊嘅《螺旋型防波堤》巨型雕塑、荒蕪嘅深谷同荒漠等等。喺每個展演地點，藝術家都係右手拎住手掌大細嘅火藥管，向天引爆，產生嘅煙霧形成一朵白色蘑菇雲，升到半空。有啲蘑菇雲會拖住長長嘅尾巴，令到雲嘅高度有藝術家咁高，甚至比藝術家高約兩倍。

喺呢個系列嘅照片入面，拍攝嘅景物距離相機愈遠，體積就愈細，有前景大、遠景小嘅視覺效果。所以將照片中景冒起嘅嗰舊雲，同遠景嘅城市一齊睇，個畫面就好似對岸繁華嘅城巿發生爆炸，升起一團巨型蘑菇雲。